Die Kerweredd 2019

von Konstantin Waldherr

Prolog

Griesst eich liewe Leit,
schää dass er alle do seid!
Bevor isch meines Amtes walde
und den een odder annere ä klitzekleenes bissel disse
will isch d` Tradition im Aag behalde
denn dem Guschdl sei Worde därf ma in keenere Kerweredd vermisse!

Guschdls Eileidung

Eisch allminanner, die ihr so zahlreich ums Rohrbacher Rothaus
versammelt seid, gilt unser herzlischer Willkummensgruß zu unserer berihmde
un a neie Rohrbacher Traditionskerwe 2019!
In de Gruß eigschlosse sin alle
- Eiheimische
- Zugezorrene un
- Bsucher
uff unserer riesische Rohrbacher Gemarjung
- vun de Laamer Grenz drauß bis nei in d Markscheid, un
- vum Bierheller Houf un de Gaberjer Grenz drowwe
- bis niwwer zum Helleschtaa
Ja, unser Rohrbach isch grouß un reisch un gschischdlisch indressant,
war bei der Eigemeindung am 1. April 1927 (a als Aprilscherz von 1927 bezeichnet, Anmerkung des Redners) mit 1140 Hekdar en wertvoller Batze
fer unser Stadt Heidelberg un hot schun gewaldisch durch Iwwerbauung blute misse.
Uff unserer Gemarjung lieje nämlisch
- Alt-Rohrbach mit seinem sehenswerde Ortskern
- de Boxberg
- de Emmertsgrund
- de Haseleiser
- s`Gewann See
- die Siidschdadt vun de Sickinger Strooß bis an d Saarschdrooß nei,
- die Induschdriegebiete Siid un Bosseldorn
- s`Eichendorff-Forum an de Fabrik – un Sickinger Strooß un
- des alte Fuchs-Waggon- Gelände, heit`s Quartier am Turm.
Mir begriiße ganz herzlisch
die Ehregäscht vun Bund, Land, Kommune, Schule, Vereine, Pfarreie un
nadiirschlisch eich allesamt: alle Kerwegäscht aus noh un fern!

Zur neie Rohrbacher Traditionskerwe 2019!
Alles nei?

Mir Rohrbacher liiewe se jo- die Tradition
do könne ma so rischdisch schdreide
„ des hawwe ma noch nie so gmacht“ un „des war schun immer annerschda“
däde ma am liebschde in`d große weite Weld verbreide!
Doch manschmol braucht`s en Neubeginn!
do lohnt sisch`s net uff Aldem zu beharre.
die Zeit war schää, doch jetzat macht was Neies Sinn
ma muss a`mol was annerschd mache!
Die Kerwe, die jetzt vor uns liegt,
die isch en Beispiel für des Bestrewe:
Gudes zu bewahre, doch was ma nimmi so hinkriegt
kann un muss vielleischt - a net wirklisch weiderlewe!
Glaabt ma`s, mir hawwe viel bewahrt.
zwische Tradition und Neiem ä gscheidi Balance.
mir alle brenne uff de Start -
seid so gut und gebt de`m e Chance!

Unseri geliebti Baustell

Sie beglückt uns seit ner Ewigkeit
un isch doch unser all Vergnüje
befürcht` ma noch vor ein`scher Zeit
ma müsst sich nur mit eenem Mol begnüje.
Doch mansche Leit ham mitgedacht
un diese Perle, diese Augenweide
z´rück in d`Rothausstrooß gebracht
wie däde mir Rohrbacher ohne se leide.
Wie solle man sunscht die Gsundheit pfleje
un fit bleiwe uff unsere alde Dage
wieviel wennischer däde man uns beweje
misste ma direkt vor`m Häusele parke.
Morjens um Siwwene: der Presslufthammer
Glaabt ma´s Leit: des isch kee Schikan
Neueste medizinische Studie beweise:
Zu viel Schlof hot noch niemandem gutgetan.
Uns geht´s viel zu gut in unserm Land!
deutlich stärker wärd ma durch´s verzischde!!
durch die Baustell seh ma des entspannt.
was härtet denn mehr ab als ohne Wasser seine Gschäfte zu verrischde?

Wie oft fühle man uns allee
un hawwe in d` Wuuhnung allzu viel Ruh?
derzeit isch des Problem passe`
heert ma doch oafach de Arbeiter zu.
Der Daag werd kumme, isch könnt jetzt schun flenne.
es graut ma wirklisch sehr davor.
dann müsse ma widder Abschied nemme
Uff Widdersehn - in ä paar Johr!!

„Nur eemol net die Beschde“

Mir in Rohrbach sin im Grund genumme
iwwerall die Beschde.
Jeder will nach Rohrbach kumme.
wen wunnwert´s – mir sin jo a die Greeschte!
hamma doch die beste Kneipe,
des beschde Eis, de beschde Wei
deitschlandweit de beschde Rewe
ouh, mir falle dausend Punkte ei.
Doch ee Sach, die hab ich g`funne
do sin ma doch schun ganz weit unne
e Trauerspiel, ma wills net meine:
en gscheider Verohstaltungsort fir Vereine!!
Es geht schun bei der Planung los-
wieviele Leit werren etwa kumme?
Werres 80? 150 ?
ach, zur Sicherheit werd mol widder d` Eichendorffhall genumme.
Korze Erklärung, für die´s net wisse:
90 Leit gehe in de Ochse nei.
kumme dann mehr, hot ma halt gschisse
e Horrorszenario fir jeden Verei.
Die nexschdt Greeß is dann schun die Hall
bei derre isch`s dann annerschdrum
mit 120 Leit im Saal
do guckt ma dann schun ganz schä dumm!
Hot ma doch die Dag davor
den ganze Mist hot hikarre misse
steht d` greeschd Ärwett noch bevor:
Biihn uffbaue, alles stelle, schmücke, Technik, die Kulisse.
Nach dem Fest hot ma`s net gschafft.
der Abbau is des allerbeschde
dann därf ma mit der letschde Kraft
die eigne Leidensfähigkeit noch tesde.
Denn nach ner große Putzaktion
kummt d´ Iwwergab, gleich d´ Inquisition.
Die Rechnung iwwer 200 Kröde
hot ma schun längschd, d`Stadt hot jo Nöde.
Jetzt im Ernst – s´werd wirklisch Zeit
des Armutszeugnis zu beende
endlisch ä Birjerzentrum fir 150 Leit
drauß uff em Hospitalgelände.
Un bevor ma alles annere ohgeht
hot des jetzt höchste Priorität
kee Wuhnunge un a kee anneri Hall
schun gar net oani fir Beachvolleyball.
Kunscht, Kultur und Tradition
sin wischdischer als Repräsentation
Un isch weeß, wie kann ma nur uff sowas kumme...
fir Vereine, die sisch de Arsch uffreiße, vielleischt sogar fir umme.

So därf´s net weidergehe!

Mir freie uns sehr; ´s konnt doch eener eirischde!
es sah awwer länger annerschd aus;
un weil Sie, Herr Odszuck, heit do sin un sisch a häufischer verpflischde,
nemm isch Sie (weitgehend) aus der Kritik heraus!
…
5 Birjermeeschder hamma, für alle die´s net wisse!
So weit so gut, so weit so schlescht,
wenn ma des Gfiihl hot, bettle zu misse,
dass wennigschdens oaner kummt zu unserm Feschd!
Es g´heert halt mol zu eire Pflischde
do gibt`s a gar kee Diskussion
sisch die Stund e´mol eizurischde-
vor allem bei ner Neukonzeption!
Ihr könnt ma doch net ernschd verzähle,
dass ihr es jemols wage däänd
bei d`Kerwe in Hendesse zu fehle,
do wäre jo ziemlisch viele Leit vergrämt.
Ma hot in Rohrbach schun des G´fiihl
oft nur die zwette Geig zu spiele;
kann`s dreh´un wende wie man will
unnerm Strich bleibt: so denke viele!
Wenn des noch lang so weidergeht
dann muss ma doch e´mol sinniere
de Aprilscherz von 1927
eventuell zu revidiere.
Un glaabt ma´s: mir sin net so bleed
wie unsre Nochbarn uff de Insel.
Un gehe mit unserm „Rexit“ vun friih bis spät
de Mensche uff de Pinsel.
Noch unserem Austritt aus der Stadt
könnt`er bequem un ohne Ende
eierm geliebte Baby „Bahnstadt“
noch mehr Uffmerksamkeit zuwende!
Isch mach nadierlisch hier nur Scherz`,
bin selwer doch in derre Stadt gebore;
außerdem hawwe Rohrbacher e großes Herz,
wär Heidelberg doch ohne uns (hoffnungslos) verlore!!

„Heidelberjer Ausnahmezustand“

Do sitzt ma in Karlsruh in fröhlicher Runde,
uff oamol isch Heidelberg in aller Munde!
isch des net allerhand? bei uns dahoam herrscht Ausnahmezustand!
die Leit sin panisch, s´geht drunner un driwwer
iwwer Hendesse kummt d`Kadaschdroph a nach Rohrbach niwwer.
Isch denk ma noch, was hawwen die ganze Leit?
isch aus Hendesse jemols was kumme, was´d Menschheit erfeit?
Doch als ischs dann ghert hab: unser Tringge isch blau
des war mei persönlischi Apocalypse now!
- betriffts unser Bier? betriffts unsern Wei?
um Himmels Wille, alles – awwer des därf wirklisch net sei!
isch krieg Schweißausbrüch, werd immer blasser -
doch dann die Entwarnung: - es geht nur um Wasser!!

Ä besunneri Zahl

Die Zahl, die isch jo wirklisch wischdisch
die Stämme Israels, die Jinger – sie isch sogar a biblisch
so viele Muunat hot des Johr
so viele Stunde ziere`d Uhr!
Sie isch die große Engelszahl
laut Astrologie unser aller Schicksal.
Doch: en wirklisch riesegroße Murks
isch die Zahl für´n gscheite politische Diskurs
des isch´s awwer, was bei der Wahl eitrat
der zu unserem Gemeinderat.
12 Wählervereinischunge und Pardeie
liewe Leit, ihr misst ma verzeihe
Pluralismus isch e super Sach!
doch ich vermut: e riese Chaos bei zwölfe unner eem Dach!
Hoffe ma`s, dass trotz unnerschiedlicher Position
net alles in der Sackgass endet;
dass ihr eich Kleescharmützel un Stagnation
mit ganzer Kraft entgegewendet!
Es geht net drum nur durchzudrücke.
net uff eener Ideologie liegt`s Augemerk
a net drum, was im Bund passiert -
es geht um unser Heidelberg!

Spielregle sin Spielregle

Mir fällt do glei e Beischpiel ei
um des vun ewe klar zu mache
s´werd Thema in der erschde Sitzung sei
wenn´s net so traurisch wär, ma könnt fascht lache.
Jetzt kann der Typ von „der Partei“
des Zünglein an der Waage werre,
un am Ergebnis des Entscheids vorbei
den weidere Prozess versperre.
Ob uns des Ochsekopp- Ergebnis freit.
Egal- do driwwer wurd g`nug geschwätzt
un jetzat isch‘ s mol an der Zeit
dass ma d` Entscheidung in die Tat umsetzt.
Isch kann doch net sage, mir froge die Leit
un alle soll`n die Regeln akzepziere
um, wenn er in`d Hos` geht, der Bürgerentscheid
den Sinn für d` Spielregeln widder verliere.
Des Ding isch rum
der Käs` is g`esse
alles uffrege
isch u´ohgemmese.

Traurisch, traurisch

Isch hab noch gedenkt: bring´s net mit nei,
ma kann doch beide gut verstehe
doch: geehrtes Auditorium – verzeih!!
Es kann hier net so weidergehe!
Isch - mit ball 40 - konnts noch erlewe
Heidelberg – zumindescht in Oasätz en Pardyort.
guckt ma heit uff unser Nachtlewe,
wo kann man eigentlich ohbends noch fort?
Mir ware domols gern in der Schicht,
im Schwimmes un in der Unnere Strooß
fir d´ heidische Kids bleibt der Verzischt
odder sie saufes Bier halt am Rand vun der Strooß.
Des Sperrzeide-Gedees, herrje isch des peinlisch
e dabbisches johrelanges Gezeder
sin d`Leit in der Altstadt doch viele so kleinlisch
un bewege sisch dort net een Zendimeder.
Mir hawwe in Deitschland e Spitze-Verfassung
därfe wouhne an jedem beliewische Ort.
In der Unnere gilt, nach meiner Ufffassung:
wenn`s eich net basst, dann misst a halt fort.
Isch kann doch net sage: isch zieh jetzt do nunner
denn iwwer der Kneip hot ma jo Ruh.
um dann zu erfahre, Herrgott welsch Wunner:
die ballern misch nachts mit Saufparole zu.
Wie iwwerall im Lewe: der Mittelweg gewinnt.
Ma muss net uff d´ Strooße rumgröle, wenn spät am Obend, d´Nacht beginnt
Ma muss net in die Hausgäng prunze, des fändet ihr doch a net schä.
Wer saufe kann, der kann a warte un an em volle Klo ohsteh!
Rücksichtslosigkeit, Egoismus bringe uns bestimmt net weider.
deshalb: an beide Seide mei Plädoyer:
Toleranz und Verantwortung sin durchaus gscheider
un ä wirklisch besseri Idee.

Ehemolische Volkspardeie

Des nexschde Stiggel mag hart erscheine!
bin isch doch selwer bei ennem der zwee „Vereine“..
Un weil ma´s ewe net egal isch, loss ich misch jetzat driwwer aus
Wenn`s irgendwann mol keener meh meschd, dann sieht´s rischdisch diischder aus!
….
Ma dacht jo schun e paar Mol: des war´s
Hot´s doch a ohgfange mit `nere Farce
Jamaica oder doch net, e Groko ja, nee
meine Fresse, s´war wirklisch net schee.
Was kann man in eem Johr alles verhunze?
zu dabbisch e Loch in de Schnee neizubrunze.
wenn`s net leeft, wer ischen dann schuld an dem Flop?
Nadierlisch denkt ma: der Fisch stinkt vum Kopp
un wechselt ganz frählisch d` Parteispitze aus
denkt, ma käm so aus`em Umfragetief raus.
Naja, die eene sin noch net so weit
gewwe sisch mol locker bis Dezember für Zeit
wird`s en eenzelner oder doch e Doppelspitz?
als gäb`s kee annere Sorje als de Sozi-Vorsitz.
dumm nur: s´geht a gar net um eenzelne Leit
sondern um Weitsischt, Profil und Glaubwürdigkeit.
Awwer wenn der Inneminschter „Horst Seehofer“ heißt
ma die Antwort uff Rezo mit Philipp Amthor verscheißt.
an große Bevölkerungsteile vorbeiregiert
in viele Bereische s´ Profil ganz verliert
sagt, s´gibt genug Ärwett in der Pardei
um morje dann Chefin fir Verteidischung zu sei.
Ma verprellt Millione demonstrierende Kids
der Umgang mit Fridays for future war n` Witz
Isch weeß net: hawwe se´s registriert,
was im Oschde Deitschlands politisch so bassiert??
Ma könnt beliewisch so weidermache!
doch liewe Leit, s`isch net zum lache,
ma brauche se unsre Volkspardeie
wahrscheinlich jetzat wie noch nie
denn nur, wenn se stark sin könne se verleihe
unserm Land ä stabili Demokratie!
Deshalb: isch hoff, isch sags net zu harsch:
zieht endlich die Kepp aus eierm Arsch!

Borschtpokal

Ich hab zum Oafang jo verkindet
„Altbewährtes isch uns net egal!“
Isch denk, dass jeder ihn als Tradition empfindet:
De Rohrbacher Kerwe -  Borschtpokal!
Der Bernd hot ihn in`s Lewe g`rufe
fir Leit, wo`s alle wisse solle,
die immer ä Mords-Pensum abrufe
un net nur schwätze, sondern schaffe wolle!
Liewer Bernd, isch bleib bei dir
denn sunscht isch ma`s zu kompliziert
un hab, bevor ich d` Iwwerblick verlier,
bis uff e Person die gleisch Jury engagiert.
Der Träger des begeehrten Preises
Isch in viel` Vereine engagiert.
Sängereinheit, Stadtteilverein und Gockler
un dabei nie de Iwwerblick verliert.
Er macht grad d´ Technik un stellt noch annere Weische
es freut mich bsunnerschd Johann, James Zuber den Pokal zu iwwerreische

Epilog

Es gäb noch souviel zu verzähle,
doch alles hot emol e End.
Jetzat wolle mer d´ Gorjel eele
weil´s jedem schun im Hals drin brennt.
Auf ihr Leit kummt alle mit - nach vorne vor die Eichendorffhall
die Stände sin schun alle uff, sunscht wird doch unser Geld net all!
Mir losse´s jetzt so rischdisch krache
losset d` Sorje Sorje sei
drei Dag lang könnt a jetzat mache,
was des Herz so rischdisch freit
mit`nanner schwätze, esse, trinke.. - alles annere is worscht
herzlisch – eiern Kerweborscht!