Die Kerweredd 2023
von Konstantin Waldherr
Prolog
Hallo mit´nanner, liewe Leit,
isch will eisch ganz besunnerschd grieße!
Endlisch: es isch Kerwezeit,
ma därffe drei Dääg voll genieße!
Der Kiddel ooa, der Hut isch uff,
des isch mei jährlisch Maskerade.
Jetz´ kriegt so manscher oaner druff.
In diesem Outfit gibt´s kee Gnade!
Denn heit bin isch der Kerweborscht,
der Vorschdand ruht mol fir ä Stund;
des heeßt: mir isch so mansches worscht,
was glei verlosset meinen Mund!
Es scheint ma eh in denne Daage:
Es misse widder mansche lerne,
ä anner Meinung zu ertrage,
uuhn´ sisch vum Oastand zu entferne!
Es g´heert heit widder zu de Pflischde,
viele Leit` zu kriddisiere;
frei´misch druff jetz´glei zu dischde:
Jammert net! s´ isch nur Satire!
Wenn´s eisch trifft, nemmt´s mit Humor,
ertragt den Hohn un Spott der Leit!
Un schbart´s eisch dann im nexschde Johr,
un macht´s bis do hiie halt mol g´scheit!
Wechselbiirjer!?
Mit Vorschusslorbeer` kam se oo,
Minischderin vum ganze Land,
„die wähle misch jo sowieso!
Die Schdadt isch griie- des isch bekannt!“
Der Eckart kriegte b´schdimmt die Kris`:
„wo will`en die do jetzat hie?
Des find´ isch awwer ganz schee fies!
Jetzt koscht` der Wahlkampf misch jo Miih!“
Sie wurd´ vun Oafang oo dann g´froogt,
wuu d´Usach` fiir de Wechsel lieje;
do hot se sisch schun arg geploogt,
um sisch des g´scheit zurechtzubieje!
Un als es dann um Inhalt´ ging,
um Ängschd, die´d Leit` im Herze traache…
Des war halt net so ganz ihr Ding,
um´s mol aus meiner Sischt zu saache!
Im erschde Wahlgang wurd´s schun klar:
In d´meischde Schdadtteil` zimmlisch hunne!
Un selbschd dahoam wurd´s offenbar:
Net e´mol im Paffegrund gewunne!
An sisch, do isch´s jo koi Trageed´,
ma kann jo mol, ä Wahl verliere!
Dann wär´s halt awwer net ganz bleed,
dät´ ma des aa so akzeptiere!
Hot`se net! gar weit gefehlt:
„es kummt druff oa, wie ma des nimmt.
Der Eckart wurd´ doch abgewählt,
die Mehrheit hätt` fiir d´Wechsel g´schdimmt.“
Ganz genau, so leeft die Sach`,
Griie hott´s im Bund schun so empfunne,
un hott` die Wahl zum Bundesdach,
mit värzeh´ Prozent praktisch g´wunne!
Vorm zwedde Wahlgang konnt`ma schbiere
Die Griene wisse, wuu des endet,
Theresia werd` die Wahl verliere!
Viele ware eh schu` abgewendet!
Die Hoffnung war nu` ausgetroamt:
„griener Stadtrat, grie` OB.“
Schuld war sie - s´werd uffgeroamt!
„Sie därf widder noch Schduddgart geh`.“
Do seid´er dann net zimberlisch,
wenn oaner nimmi basse dut,
dann heeßt´s am Ende unner´m Schdrisch:
„Uff Widdersehn, nimm deinen Hut!“
Der nexschde isch noch Birjermeeschder!
Uff oamol war´er nimmi reschd;
ich weeß jo net, awwer es heeßt, dass
er halt hott des falsch´ Geschlescht.
Er setzte lang als Dezernent
in d´ Chancegleischheit Energie.
un jetzat nahm es dieses End`!
Schun ä seltsam` Ironie…
Er wollt` net geh´n, doch´s war egal.
Nooch 16 Johr isch Schicht im Schacht.
Ä letschdi Schbitz` dann nooch der Wahl,
an sei Pardei; nu isch´s vollbracht.
Zurick zur Wahl, der Reschd isch Geschischde!
Eckart wurd´s zum dritte Mol!
Viel Erfolg bei deine Pflischde,
die Wahl isch rum- jetz mach´sch e´Mol!
„Selwer schuld?“
Gut, es kam net iwwer Nacht,
ma wusst jo schun – es könnt so kumme.
Die Schdadt hot sehr lang low gemacht,
doch nu sei ma in´d Pflischd genumme.
„D´EU-Verordnung sei dro schuld.
Lamentiere hot keen Zweck.
Es drängt- mir häwwe kee Geduld:
Än Haufe` Parkplätz´ falle weg!“
„Freie Gehweg“ nennt sisch des,
„Mir fange oo in´d Turnerstrooß“
Dänooch geht´s weider im Prozess,
do simm´a jetzat rigoros!
„Die Parkplätz´ sei´n eh illegal,
die ganz Zeit´ nur ä Wunschprodukt.“
Naja, jetz´ halded flach de Ball.
S´ hot eisch Jahrzehnde net gejuckt!...
An sisch do leuschded´s mir jo ei:
Rollstuhlfahrer, Kinnerwage
kumme oftmols net vorbei,
wenn´d dicke SUV´s dort parke.
Doch wie so oft des Hauptproblem,
des Ärgers schärfschdi Munition:
„Wie geh´ ich droo un außerdem,
wie leeft die Kommunikation!“
Wenn isch uff´d oane Seit´ was schdreisch,
was Knabbes rationalisiere,
dann braucht´s Ersatz; un zwar zugleisch!
Des isch net so schwer zu kabiere!
Denn wenn´s in d´Turner nimmi geht,
dann werd der Druck wuuannerschd groß!
Isch schbiel mol jetzat än Prophet:
Vermut´mol in d´Kärschgardeschdrooß.
Denn´d Audos, lieb´Verwaldungsgreeße
un mansche der Gemeinderäde,
werr´n sisch net in Luft uffleese,
aa wenn sisch´s mansche winsche däde.
Die Haldung gegeniwwer d´Leid:
„du fährsch´ noch Audo, selwer schuld“!
Isch ignorant un mit der Zeit
verliern´die Mensche die Geduld.
Denn lebsch` in d´Schdadt un kannsch´mi´m Rad
odder Bus alles erreische,
hot ma leischt ä Gosch parat,
un kann nooch Verbode kreische.
Schdellt eisch vor, es gibt a Leit´,
mit net ganz so grouß Gehäldern,
net mobil, net so viel Zeit,
mit net soo schdinkreische Eldern.
Mansche sin druff oagewiese,
könne´s gar net annerschd händeln,
wuuhne drauß bei Wald un Wiese,
uuhne Bus un uuhne Bämmbeln.
Deshalb braucht es Kompromisse,
denn die Froog, des kann isch schbüre,
wird die eh schun tiefe Risse
in da G´schallschaft weider schüre!
Where have all the Fachkräft`gone?
Ma frägt sisch jo, wuu sin se hiie?
Im Kloschder bei de Zisterzienser?
Darschdeller im Trash-TV?
Bei Inschda alle Influencer?
Es fehle Fachkräft` iwwerall;
in jeder Branche, jedem Job.
In mansche is es ganz fatal.
Kee Land in Sischt; s´geht im Galopp…
Zu wenisch` Profis in der Pflege,
Gastro, Kitas, Lehrerschaft,
Fachleit`, die die Fliese lege,
im Kanzleramt ä Führungskraft.
Do braucht´s Konzepde un Idee`,
diesem Trend entgeje´z´wirge.
Doch mansch` Versuche dunne weh,
weil sie, Zitat: „viel Dummheit birge.“
So des Banner vun Frau Schopper.
Welch Gebabbel uuhne Sinn!
Herrgott noa, was fiir´n Klobber,
Frau Kultusminischderin!
Gelandet und gar keinen Bock auf Arbeit morgen?
Hurraaa!
Mach, was dir Spaß macht und werde Lehrer*in
Part of THE LÄND!
Der greeschde Mangel, wie ma sieht,
an Fachkräft´ isch in eierm Haus;
isch helf´eisch mol, bin jo bemiiht,
un geb´ die Schdelleoa´zeig naus:
„Du hosch bisher kaum was g´risse,
Praxis isch eher nix fiir disch;
Dei` Idee´ sin meischdens b´schisse,
fiihlsch´ disch nimmi ganz so frisch!
Du kannsch lese, viel mehr braucht´s net,
babbelsch` gern um alles rum.
Oaner mehr macht de Bock net fett.
Kumm ins Minischderium.“
Du bisch pikiert, siehsch´ des als Hohn?...
Kann es wie du net kabiere!
S´war doch nie mei` Intention!
Wollt` niemand diskreditiere!
Zu der Ei´gangsfroog zurick,
wuu´d Fachkräft´ heitzudaage sin:
ma sieht´s doch uff de erschde Blick,
nadierlisch alle in Berlin.
Verkehrsknodepunkt Rathausstrooß
Fiir viele kam`s hoppladihopp,
am meischde scheinbar fiir des Amt.
Nur des erklärt den Rieseflop,
der sisch uns hott` in s´Härrn gebrannt.
Ma musst` die Gleise rebariere,
am Rohrbach Markt uff der B3.
Schnell, sunschd däät noch was bassiere.
Jetz´ kummt kee Audo meh` vorbei.
Die Mitarbeider vun Frau Sauer
denke sisch: „mach` ma net rum!
Mir lenke, denn des isch viel schlauer,
die Audos durch de Ortskern um.
Vor-Ort-Termin – Quatsch, muss net sei!
In d´Rathausstrooß kummt, kee Problem,
n´Bus am Laschder doch vorbei,
des kann ma uff´m Schdadtplan seh´n.
Die Folge dieser „Heimatkunde“:
Verkehrsgefährdung, Chaos, Schdau.
Rohrbach war in aller Munde,
faschd än Fall fiir d´Tagesschau.
Knud Jahnke konnt´ des nimmi seh´n
un trat vun seinem Amt zurick.
„Wie solle d´Kinner denn do geh´n,
s´hott niemand meh´ än Iwwerblick.
Des Amt sah´s wennigschdens schnell ei,
un schickde ball de GVD,
der mussde nu´der Redder sei,
un uff´m Weg Patroille steh´.
Beim nexschde Mol, nemmt eisch die Zeit,
un zieht do eier´ Lehre draus`;
denn macht´ers noch e´mol net g`scheit
geht´s vielleischt net so glimpflisch aus.
„Lebe hoch, du Monarschie!“
Wahnsinn diese Mensche´masse,
jedes Medium voll` Erweehnung.
Prunk und Glamour- kaum zu fasse!
Ganz viel Promis bei da Kreehnung!
Selbschd im Johr Zweedreiezwannschisch,
isch se populär wie nie!
Kaum verschdaabt, schunn gar net rannzisch!
Lebe hoch- du Monarschie!
Bleedsinn- den Charles moan isch net!
Käm mir niemols in de Sinn.
Moan doch: Larissa die zwett!
Unser nei Woikeenischin!
Cathy musst´ beruflisch weider
in die weide Welt nauszieh´n.
Vun dem Nabel der Welt, leider,
in ä Nescht namens „Berlin“!
Die Larissa mäscht des klasse!
Ham´ma grad jo ewe g´sehn.
Isch glaab, des dutt subber basse,
Viel Erfolg un Wohlergeh´n!
Ja ok, aa iwwer Rohrbach
naus isch´d Monarschie im Trend!
Denkt mol, als die Sylvia do war:
Gott, sinn domols d´ Leit noag´rennt.
Die Ehrewürd´ vun Heidelberg,
ja, die hot se jetz´ zurescht.
Grandioses Lebenswerk!
Sympathisch, bodeschdändisch, escht.
Dann doch korz iwwer de Kanal:
Kapier` escht net den Hype do drum.
Der Keenisch do isch mir egal.
Charles- naja, bringt eher keen Schwung!
Nooch iwwer 70 Johr als Queen,
isch sei Mudder nu verschiede;
sie hot´ unser´n Reschbekt verdient!
God save you un ruh` in Friede!
„Dann bleibt doch dahoam“
Iwwer G´schmack lässt sisch jo schdreide!
Meins ischs net, un werd´s aa nimmer.
Doch was mansche Leit` verbreide:
Kinners- es werd immer schlimmer!
Faschingsumzug Heidelberg.
Guudi Laune – ausgelosse!
Uff d` Pardy liegt des Augemerk,
nadierlisch is der Alk aa g´flosse.
Plötzlisch kummt es zum Skandal,
zitier mol uuhne Dialekt:
„zwei der Lieder: ganz fatal,
pfui, politisch nicht korrekt!“
Oans davuu- ja klar: die Layla!
Mieser Song- der Text aa bleed.
„Sie sei scheener, jinger, geiler.“
Jo isch rescht- wenn ihr´s so seht!
Nimmand muss die Lieder heere,
net dahoam, net uff´m Zug.
Dutt´s eisch wirklisch so arg schdeere,
bleibt halt fort; isch hab´genug!
Sexismus isch ä Sauerei,
un gibt´s aa leider viel zu oft;
in dem Fall schwätzt´er ihn herbei,
wenn´d Menge uff die Mukke hoppft.
Wenn ma schdändisch iwwertreibt,
wollt er´s endlisch mol kabiere,
werr´n die Leit, wuu er verbleibt,
die Uffmerksamkeit verliere!
Vun de Nörgler (Pause) d´greeschde Teil,
dutt wohl gern die Rosi heere,
odder Barbie mittlerweil`,
fiir die Gleischschdellung verehre.
Un- es isch aa kontraproduktiv,
iwwer ä´ bleed´s Lied oft zu schenne,
denn dann dutt´s definitiv,
jeder Hannebambel kenne.
Fiir nexschd Johr hab isch ä Idee:
Kimmert ihr eisch um die Sach,
(un) schbielt ganz eefach, Gott wie schee,
Mozart, Haydn odder Bach.
Koschdet awwer scheiß viel Miih,
ehreamtlisch´, uuhne Grosche!
Klar: „zu viel, krieg´ma net hie“!
Dann haldet awwer doch die Gosche!
Deitschland- quo vadis?
Wenn du heit´uff d´ G´schellschaft schauscht,
un die große Politik.
Fiiehl disch aa wie Goethes Fauscht,
in sei´m gleischnamische Schdick?
(Natürlich etwas abgewandelt)
„Nur mit Entsetze wach isch morgends auf,
isch könnte bitt´re Träne weine,
den Tag zu seh´n, an dem in seinem Lauf,
mol widder so viel Bleedheit werd´ erscheine.“
Isch weeß net, was isch mit uns los!?
Wuuran liegt denn dieser Trend?
Denk´ma, mir sin so famos,
die Beschde uff´m Kondinent!?
Dabbisch`Leit´gab´s jo schun immer,
doch der große Unnerschied,
die „Normale“, faschd noch schlimmer,
mache` diesen Scheiß jetz´ mit!
Könnt jetz´ hunnert Beischbiel` nenne,
um eisch des nu´ zu erkläre,
langsam dutt mei Kehl´ doch brenne,
deshalb nur die ganz prekäre:
Schwarz-rot-gold, des schdand e´mol,
fiir de Droaam, nooch Einheit, Reschde.
(Pause) Der Demokrade heechschd` Symbol,
(Pause) durch lange Zeide, gude, schleschde!
Eurovision-Songcontest,
ich guck den Mischt schun lang nimmi,
ä Fahnemeer beim Länderfeschd,
doch wuu isch´n die deitsch´ Fahn hie?
Die „Kinnschdler“ vun hier dachte sisch:
„die Regebogefahn´ dutt lange.“
Erkläre dobei feierlisch:
Mir kenn´ mit Deitschland nix oafange.“
„Regeboge“ därff gern sei,
Toleranz isch mehr als wischdisch,
als Ersatz fiir unser drei
Farwe, nee- des isch net rischdisch!
Än gesunder Heimatzugang,
viele` scheinbar widerstrebt;
kriege´s leider schun ä Zeit lang,
vun mansch´ oanem vorgelebt.
(natürlich ganz hypothetisch…)
Es ziehe Leit` in eenen Ort,
mir sage mol: newer ä Hall`.
En Kerweplatz isch aa noch dort,
doch schdändisch mache se Krawall.
Bei insg´samt zwee Feschtlin im Johr
Kann ma doch zum Wohl vum Ort,
des ertrage, schdellt eisch vor!
Un wenn net: „dann geht halt fort“.
Es isch leider keen Eenzelfall,
dass mansche sisch net fiige kenne,
„besser sin“ un iwwerall,
beschwer´n un zu d´Behörde renne.
Un fiihle sisch dabei im Rescht,
wenn se Paragraf´durschsetze`.
in´nem Ort, beim greeschde Fescht,
gibt´s aa uugsch´rieb´ne Gesetze…
Erzieherin´ in d` Kinnergärde,
därffe d´Kids nimmi berihre,
denn ma könnt´s jo komisch weerde,
Leit´s, wuuhii dutt des denn fiihre?!
Ä Kind mit grad e ´mol drei Johr,
muss sich jetzat selbschd ei´schmiere.
Die Sunnemilsch hängt nur im Hoor,
vun UV- Schutz nix zu schbiere.
Die Bundesjugendspiele galde
bei de Kinner lang sehr viel.
D´Beschde durfte n´Preis hochhalde,
die anner´n hatte´ Schbaß am Schbiel.
Des de Kinner nu´ zu nemme,
weil ma völlisch fälschlich denkt,
dass die Uuschbortlisch´ sisch schämme,
odder sie´s Ergebnis kränkt.
„Leischdung zahlt sisch nimmi aus,
Oaschdrengung dutt sisch net lohne“,
Ganz genau des lern´se draus;
Werr´n sisch schbäder aa bloß schone…
Immer dieses Weggeroame
vun all´ Sorje und Problem`.
Wollt´er eier Kinner forme,
losst´se selbschd ins Lewe gehn`.
Des Ergebnis vun dem ganze,
sieht ma jo im deitsche Schbort.
Leischtathlethik, Fußball, Danze:
mir sin glei am Oafang fort!...
S´war jetz´mol än Rundumschlag,
durch unser G´sellschaft in dem Johr.
Des wischtigschd` Thema, gar kee Frag,
Nemm isch ma jetz´zum Abschluss vor:
Es isch än sehr traurischer Trend,
kaum zu fasse, gar net schee!
Die G´fahr, wie laang net, existent!
So schdark wie nie, die AfD.
Doch es kam net iwwer Nacht!
Viele ignorierte d´ Warnung`,
sin oafach net uffgewacht;
mansche glaabte ihrer Tarnung!
Des Gebabbel vun ganz viele:
„Alles Nazis aus dem Oschde,
Vollversager uuhne Ziele“,
tja, des werd´uns jetz´ was koschde.
Des, was sie do unnerschdellde,
war ganz eefach ignorant,
kann laut Umfrääg` nimmi gelde:
zweddi Kraft in unserm´ Land.
Fiir misch isch´s kee Entschuldischung,
trotz Krise unserer Politik,
sie zu wähle dodedrum,
isch geh´ mol in der G´schicht´ zurick:
Deitschland in de Dreißischer:
Weimar liggt zerschdört dahin.
Schdudiert ma die Zeit fleißischer,
kann ma Parallele ziehn:
Papen und Weltwärtschaftskrise
Verfassungsfehler un Versailles,
Hindenburg un wie se hieße,
war´n ganz sischer schuld dabei.
Doch die allergreeschde Schwäche
ware Angschd, Enttäuschung, Fruschd,
viele uuerfüllt´ Verschbreche
un System-Vertrau´nsverluscht.
Des Gfiihl, mehr braucht´s net, für die Leit,
dass die Regierung sie net sieht,
net wahrnimmt, was im hier un heit,
un um sie rum im Land geschieht.
Der Vorwurf, es däät nur um Macht gehn`,
dass sie am Volk vorbeiregiere,
fiir ihr Fehler nimmi grad´ schdehn,
un d Kontroll´ im Land verliere.
Ma kann´s zum Glick net ganz vergleische´.
Doch ihr könnt´dem net entflieh´n;
mansch´Aspekte sin die gleische.
Ihr miss´t eier´ Lehre ziehn´!
Also Kanzler un Minischder,
zieht de Kopp jetz´aus em Arsch!
Wuu des domols endet´, wisst´er.
Also handelt, aber marsch!
Des geht aa an d´CDU
Klärt mol eiern Rischdungsschdreit.
Schdändisch heeßts: „Die Schuld hosch´ du“
Ihr habt ä Uffgab`! Macht se g´scheit!
Epilog
Es gäb` noch souviel zu verzähle,
doch alles hot emol e End.
Jetzat wolle mer d´ Gorjel eele,
weil´s jedem schunn im Hals drin brennt.
Auf ihr Leit, des werd der Hit:
mir gehe z´samme vor zur Hall.
Des Portemonnaie nemmt´er schee mit,
sunscht werd doch eier Geld net all!
Mir losse´s mol so rischdisch krache!
sin jetz` drei Daag lang nur froh.
Ihr braucht eisch mol kee Sorje mache,
die sin am Muundag aa noch do!
Un kummt´er irgendwann net weider,
wenn´er noch der Wohrheit forscht:
verzweifelt net! Kummt, des isch g´scheider,
zu mir, zu eierm Kerweborscht!