Die Kerweredd 2018

von Bernd Frauenfeld

Eileitung

Die Zeit si rennt un bleibt net steh,
a´s letschde Johr is manches gscheh
wu sicherlich net jedem g´fällt,
so dreht si sich halt, unser Welt.
Un aus manche vun so Gschichte,
werre dann die Ortsnochrischde,
die halle durch die Rothausstroos
horscht her ihr Leit – weil jetzt geht’s los!

Ärjerlich

Die Leit dun sich die Aare reibe,
s´ìs wohr, die Bezirksbeirät dun streike.
Viel Ärjer un a Fruscht is drin,
weil si net orndlich gfrogt worn sin.
Drum packe si ihr siebe Sache
Un dun sich prompt vum Acker mache.
Ich kann die änsteils gut versteh,
glaabt mers ihr Leit, es is net schee,
Stund um Stund hosch investiert
dann erfährsch ganz ungeniert
daß des koaner interessiert.
Bloß war´n vun denne , fällt mer ei,
schun uff de annere Seit dabei.
Drum halt ich mich dezent zurick….
Ä dreckisch´s Gschäft die Politik!

Awwer losst´s Eich´s gsagt sei

Diskussione iwwer ball vier Johr,
was hawwe mer mim Hospital vor?
Vorschläg, Idee, s´gibt koa Ruh,
en jeder gibt sein Senf dezu.
Am End geht´s mehrheitlich in e deitlichi Richtung,
schä soll´s werre – also bloß koa Verdichtung!
Die Verwaltung will sich nix nochsare losse
dann hawwes d´Bezirksbeirät grad so beschlosse.
Schad bloß, daß des – wie bassiert,
im Rat drin fascht koaner interessiert.
S´gibt meener Häuser – s´geht hecher nuff,
s´steest uns gewaltisch sauer uff!
Gremien, Ausschiss un Beschlisse,
jetzt werds der letschde merje misse –
mer wern verkaaft un zwar fer dumm,
mit der oagebliche Birjerbeteilischung,
dem gepriesene Szenario –
reiß ab – knülls zamme un schmeiß es ins Klo!

Airfield

Sorjefalte, nix zum Lache,
was solle mer mim Airfield mache?
Mit dem grooße, freie Grund
Do unne, no beim Paffegrund .
Kaum kann des Hern sich noch erhole,
Projektidee iwwerhole.
Luisepark light odder Betriebshof hin
odder besser doch de Zeppelin?
Des sin die Ferz wu die Leit dreiwe,
wu uns wuannerscht Leesunge schuldig bleiwe.
Drum denk ich – un do werb ich drum,
mir bau´n e Delphinarium!
Jeder wees , wu in de Schul net gepennt,
die Viecher do sin hochintelligent!
S´kennte Birjermeschder odder Räte
an des Beckens Rand hie trete,
un heimlich frooge bei wischtische Sache –
Horsch „Flipper“ – wie dätsch Du´s dann mache?

Ploonunge

Ich glaab do kemmer einisch geh,
do am Bohnhof is net schee.
A fer Milliune nei verbaut,
is die Optik eher versaut.
Awwer nach all de Ploonungsdrome –
en neier Platz braucht en neie Nome.
Weller awwer solls jetzt sei –
en jeder Kaschper mischt sich ei.
Präsidente, Gelehrte, Honoratiore,
wann´d Glick hosch bisch im richtische Johr gebore,
werre gnadelos durch die Mangel gedreht,
bis a´s der Letschde nimmie versteht!
Der Kommissione Hern is duschter –
jeden Dag e neies Muschder!
Ich glaab net, daß des noch jemand g´fällt
un außerdem koscht´s unser Geld.
S´werd heit so als wie immer sei –
zuviel Kech verderwe de Brei.
Un drifft´s so manchen Plooner bitter:
Scheiße ausseh werds dann widder!

E Licht geht uff

Drogeg´schäfte uff der Neckarwies,
net zum toleriere – hoch kriminell –
unser Verwaltung reagiert awwer hortisch –
basst uff ihr Berschtlin, jetzt mache mers hell!
Jetzt stelle mer nämlich an der Wiss Lampe druff
un er werd emol seh, dann hert der Spuk uff.
Die Dealer freits – misse sich nimmie so quäle,
so lässt ´sich´s Wechselgeld viel besser zähle ……..
….(.vielleicht doch en annere Oasatz ?)

Zammefort

Zammefort is so en Begriff
wu net jeder wees, wie er eisortiert is.
Wann´s leeft – so wie immer – im gewohnte Trott
do mache die äne gern so zammefort.
Annere sare – des is newa der Kapp,
zammefort is erledischt, alte Zepf misse ab!
Wie halte mer´s jetzt mit neie Welle –
die Frog muß jeder fer sich selwer Stelle.
Annerschda is oft jetzt des Zauberwort
Un nix meh mit bloß so zammefort.
Ma muß des oansteils jo versteh,
s´kann nix fer ewisch weitergeh.
Bei hellem Licht betracht mecht ich awwer wette:
daß´mer bei manchem besser so zammefort gemacht hätte!

Social media

In de Zeitung hab ich en Artikel gelese,
do bin ich denoch richtisch fertisch gewese.
S´geht do drin um en alde Mann,
er schnauft schun ganz schwer un denkt „ich hab nimmie lang“.
Ziemlich spät am Obend , fascht vertel vor Zwelfe,
do flattre 3 Elfe nei :“ Du mer kenne der helfe!“
„Un Dir G´sundheit un alles Glick zurückhole –
Musch uns bloß e Bild vum me Arschloch hiemole!“
Jetzt denkt er noch – immer un immer widder,
dann die Idee – guck mol uff Twitter.
Un find enoch zu später Stund
de Trump, de Ami –Schäferhund!
Der holzt sich munter durch die Welt,
kaum oaner gibt’s wu des noch g´fällt.
Pechdunkli Nacht umwogt sei Hern,
drum hawwe´n alle Leit so gern.
Doch in de bisherisch Unione
hängt alles an de Infusione.
Jetzt ruft der Mann verzweifelt aus:
„so sieht e rischtischs Arschloch aus!!!“
Er werd tatsächlich däglisch fitter,
hot´s geschdern erscht geposcht uff Twitter!

Borschtpokal

In Schwede gibt´s die Nobbelpreise,
findsch die Verleihung manchmol schlecht
-weil – wann´s genau dir iwwerlegsch-
en annere du liewer hättsch.
Ganz annerscht halte mirs lokal
beim schun beriehmde Borschtpokal.
den krigge bloß die echte Helde,
Kritik gibt´do net oazumelde.

Un des Johr :
Beirat – Borscht – Museumsdirektor
Torner – Gärtler – frieher Bohninspektor
E großes Dankschee aus voller Bruscht:
2018 Knaubers Guscht!!!

Un :
Wer is ball 20 Johr gerennt,
wenn irjendwo der Kittel brennt?
Wer hot mit Bierruh un mit Kraft
fer Rohrbach stets e Lesung g´schafft?
Weils s´letschde Johr is gibt´s heit zwee
des muß mer a mol praktisch seh.
Applaus fer Ulli Pfefferkorn –
kumm nuff, weil Du wärsch´s s´next Johr worn!!!

Kinnergaarde

Frau Leiterin, Frau Leiterin, sescht die Praktikantin im Kinnergaarde:
der Horscht dreht immer de Schlissel rum zum Gemeinschaftsraum –
do kumme die annere Kinner net an ihr Friehstick
…. Loss en , der zieht mit seiner Familie in zwee Woche eh wider nach Bayern!

Frau Leiterin, Frau Leiterin, sescht die Praktikantin im Kinnergarde:
Die Angela hockt in de Eck, hot die Händ g´fallte un macht gar nix
….des geht in Ordnung
Wie heest mern des?
….Aussitze!

Frau Leiterin, Frau Leiterin …
der Alex reizt dauernd den ei´gsperrte Dobermann im Käfisch
….uffschließe!
Frau Leiterin, Frau Leiterin …
die Andrea is immer so olwer zu de annere Kinner un die droht immer so
… loss si, die dutt käm wirklich weh!

Frau Leiterin, Frau Leiterin …
der Christian wees net ob er sein Latz rechts – odder linksrum uffmache soll – un jetzt hot er in die Hos gerabbelt
… des is net schlimm, der is noch in de Findung!

Frau Leiterin,
die Sarah hot widder ihr scheenes rotes Kleid oh un sie bestimmt, daß die Dechter vum Dokter Brinkmann sich kä neies Kleid kaafe derfe
….mach en Schlitz nei!

Frau Leiterin …
do steht e Päärle draus, die wolle zig Kinner oamelde un hawwe ganz griene Jäcklin oa
… schnell mach die Deere zu!
Leit wann die emol grooß sin
Ich glaabs heit schun zu wisse,
dann wer mer uns all ziemlich warm ohziehe misse!

Kerche

Dagwerk vollbracht – stockdiefi Nacht,
Kerche erstrahlt in voller Pracht.
Jetzt bitte bloß kä Kataschtrofe
…am liebschde is mers wann sie schloofe!

Sonntag 29.07.2018/20.17 Uhr /Terrass /39°

Is des en scheener, heißer Summer,
s´bretzelt rischtisch, d´Sunn geht fascht nie unner,
brauni Haut un freii Zeit
iwweral bloß glickliche Leit.
Eis, Schwimmbad, auf ins kiehle Naß,
was hawwe mer fern Heidespaß.
Entspannung heest des Zauberwort,
Urlaub – ins Auto – erscht mol fort.
Die annere dahoam , die halte sich wacker,
misse trotzdem ins Büro odder uff de Acker,
wechsle die Hemde , die Unnerhos,
was immer du mach´s , s´leeft ständig die Soß .
Schweiß uff de Stern un babbisch die Händ,
alles was grad mach´sch hosch schun besser gekennt.
Un Obends die lästisch Diskutiererei :
„Ungeduscht kummsch mer net in mei Schlofzimmer nei“
Wenn ich des so reim – ich ferscht ich werd älter,
s´wär mer eijentlich liewer ,s´wär 15 Grad kälter!

Enot halt

Oans noch, was ich Eich sare muß,
fer mich als Borscht is des Johr Schluß !
S´hot sich ausgereimt un vorgetrare
sìs Zeit uff Widdersehn zum sare.
A wenn´s nach viele Johr jetzt reicht,
der Schritt fällt mer net richtisch leicht,
verdrigg vielleicht ä Drän sogar,
schee war die Zeit, wu mit Eich war!

BONUS TRACK

Disziplin

S´ware emol vier alde Schildkreete,
wie die g´heese hawwe , wees so genau koaner mehr.
Ich män Werzner , Öztürk, Erichson un Gerner,
awwer , wie g´sagt – sìs schun so lang her.
Sin am Marktplatz gsesse mit volle Beich
Un droame vum e frische, neie Teich.
Auf zum nächste Wasserloch !!! – hawwe si gerufe –

Un dann sin si geloffe: ä Johr – zwee Johr – drei Johr …..

Si hawwe en Tümpel in der Bahnstadt g´sucht,
die is zwar unneedisch, awwer ausgebucht.

„Auf nei jetzt „ hot die Erichson Schildkreet gerufe – „ich hab Dorscht!“
„Halt emol“ – hot die Werzner Schildkreet g´sagt,
„habt ihr iwwerhaupt eier Becher parat?“

Scheiße, vergesse!!

„Alla“ sescht die Werzner Schildkreet- „un isch´s a e Ploog,
ich laaf halt zurick un hol si uns nooch!“

Un si warde: ä Johr – zwee Johr – fascht drei Johr….
Dann sescht die Öztürk Schildkreet :“horsch ich bin doch net bleed ,
wu ewisch do schun des Wasser steht „
„Hajo sescht die Gerner Kreet – ich bin ebei,
auf mer henke jetzt all unsern Rüssel do nei!“

Do bricht die Werzner Kreet raus aussem Moos –
„Un wann der mich verarsche wollt , laaf ich gar net erscht los!“