Die Kerweredd 2024
Kerweredd 2024
von Konstantin Waldherr
Prolog
Hallo mit´nanner, liewe Leit,
isch will eisch ganz besunnerschd grieße!
Endlisch widder Kerwezeit,
ma därffe drei Daag voll genieße!
Der Kiddel ooa, der Hut isch uff,
des isch mei jährlisch Maskerade.
Jetz´ kriegt so manscher oaner druff.
In diesem Outfit gibt´s kee Gnade!
Denn heit bin isch der Kerweborscht,
der Vorschdand ruht mol fiir ä Stund;
des heeßt: mir isch so mansches worscht,
was glei verlosset meinen Mund!
Es scheint ma eh in denne Daage:
Mansche misse´s wiedder lerne,
ä anner Meinung zu ertrage,
un net glei oafang´ zu flenne.
Es g´heert heit widder zu de Pflischde,
viele Leit` zu kriddisiere;
frei´misch druff jetz´glei zu dischde:
Pienst net rum, es isch Satire!
Wenn´s eisch trifft, nemmt´s mit Humor,
ertragt den Hohn un Schbott der Leit!
Un schbart´s eisch dann im nexschde Johr,
un macht´s bis do hiie halt mol g´scheit!
Mein Fokus liegt uff dem was doo
in Rohrbach, Heidelberg bassiert.
Gut, am End´, des gheert´sisch so,
werd` die Regierung aa rasiert.
In Rohrbach doo isch´s heiß
So fängt die Rohrbach-Hymne oa,
de meischde werd´ se nix mee´ saache,
un weil isch druff Bezug nemm´ noa
werd´ der Liederkranz des Lied vortraache:
In Rohrbach doo isch´s heiß
Ein jeder Bursche, der das weiß.
Do werd ma ausvisitieret,
ob ma Messer odder Gawwel mit sisch fiihret.
Do werd ma jo verdunnert un vor´s Amtsgericht gebracht,
in dem scheene Rohrbach bei Nacht.
Des Lied dutt uns jo suggeriere,
was ma jo gar net glaawe will,
ma däät hier seinen Kopp riskiere,
dobei isch Rohrbach zimmlisch schdill.
Mir saße letschdens bei de Blaue,
erfuhr´n, was d´ Bolizei so mäschd;
do konnt´ isch meine Aag´ net traue,
was´d Kriminalschdatistik säschd.
Der Leider dort, der des jo woaß,
hot g´sacht: nur Ruh, alles normal!
In Rohrbach isch´s net wirklisch hoaß,
gemesse an d´ Bewuuhnerzahl.
Des G´fährlischsde in eierm Ort
sin net Gewalt, Raub un Betrug.
Aa net Erpressung, Diebschdahl, Mord,
sondern eiern Mardinszug!
Annerschd sieht´s in Kersche aus,
des Doppelt, Dreifach´ an Delikte.
In´d meischd´ Schdatistik vornenaus,
es war schun krass, als ma´s erblickte.
Zur Wohrheit g´heert in dem Befund,
verzähl´ eisch hier besdimmt koi Märsche,
des PHV, en Deil vum Grund,
zählt offiziell halt noch zu Kersche.
Doch, halt! Mir kumme doch grad Zweifel:
Versucht´s mol ernschdhaft zu sinniere:
(betont) In Kersche lewe!? Arme Deifel,
häwwe nix meh´ zu verliere!
Wenn ma ganz am Bode isch,
hott aa noch Rohrbach vor da Nas´,
do schdumpft ma ab un werd´ g´fährlisch,
verschdeht vermutlisch gar koan Schbaß.
Doch liewe Staatsoawält´ un Rischder,
sie sin genung g´strooft, seid do gnädisch.
Guckt in die leidgeploogde Gsischder!
Plädiert uff uuzureschnungsfähisch.
Rohrbachs Idyll
New York hot de Central Park,
Minnsche hot de Englisch` Garde.
Monnem de Luisepark,
s´gibt dort so viel Ruh´ un Schadde!
Doch alle dunn vor Neid erblasse,
wenn se Rohrbachs Schdadtpark seh´,
Erhoulung fiir geschdressde Masse,
Idyll un Kleinod – wunnerschee!
Ihr wisst gar net, wovuu isch schwätz??
Ihr kennt net unser´n greeschde Schatz?
Die Parkoalag am, sag´s eisch jetz`,
nooch Eischedorff benannde Platz!
Gott, die Hundehaufe: herrlisch,
bringe den markande Duft.
Die Drogejunkies: uuentbehrlisch,
erfill´n mit siißem Qualm die Luft.
Die Audos fahre rund´ä´rum,
die Flasche klirre im Contäiner.
Die Bämbel bimmelt, Dreck liggt rum,
Isch woaß jo net; awwer geht´s schäiner?
Den Häähepunkt hab´isch vergesse:
der Kiosk herrlisch, top erhalde.
Der Schimmel dutt die Wänd´ zerfresse,
s´Grafitti dutt se z´ammehalde.
Seit mittlerweile viele Johr,
gibt´s Intressende uuhne Zahl.
Jeder will nei, stellt eisch vor,
die Auswahl isch ä grouße Qual!
Vielleischt kummt ball ä Restaurant
am beschde oans mit Michelin!
Un newedroo än Badeschdrand;
Isch frei misch druff, ach werd des schää!
Okay, isch hab´ leischt iwwertriwwe,
die Aussag´, die vun mir net schtammt!
Hab grad e´mol die Sischt beschriwwe
vun GGH un Landschaftsamt.
Uff unser Oofroog` was zu ännern:
Park g´scheit nutze, Haus sanier´n!
Sagt oaner vun de Landschafts- Kennern:
„Do muss gar nix druff bassier´n.“
Denn was isch bisher net wusst:
All´ in Rohrbach liewe ihn!
Drum isch aa, (Pause) nur unnerbewusst.
Des Amt hott´s mir zum Glick verzieh´n…
Zum Schluss mol uuhne Ironie:
Mir bleiwe droo, des isch kee Ding!
Zur Zeit isch´s zwar noch Utopie.
Doch s´sin schunn mansche Hiit im Ring.
Uff oamol wurd´s dungel
Beim erschde Mool do hieß es noch:
Joo, des kann jo mol bassier´n!
Schbädeschdens beim dridde Mol jedoch,
beganne mansche d´Nerve zu verlier´n.
Drei Mol in derre korzze Zeit,
en Schdromausfall bei uns im Ort!?
Die Sach´war klar: es isch so weit:
Der Unnergang, der schreidet fort!
Doch zum Glick, do hämma´ hier
ganz viel kundische Ermiddler.
Leit, die´s wisse! glaabt´des mir:
Beharrlische Systembekrittler.
Die Infos kame, gar kee Froog,
vun d´eenzisch objektive Quell:
Social Media, ganz en Vogue;
un vor allem b´sunnerschd schnell!
Demnooch ware viele schuld:
Die Russe häwwe uns gehackt!
Die Griiene hatte kee Geduld
un den Fossil-Ausstieg vollschdreckt.
Habeck kam persönlisch her
un hott die Kraftwerk abgestellt.
Seht´ er, war doch gar net schwer;
sie isch so oafach unser Welt!
Mool im Ernschd, kann´s net kabiere:
Hott es jemols zu was g´fiiehrt,
iwwers Netz zu diskutiere,
außer Dummheit demonschdriert?
Vun de Leit, die wie im Wahn,
eefach nur en Scheiß verzapfe,
kommentier´n un uuhne Plan
dursch´ soziale Netzwerk´ schdapfe.
Was die Schdromausfäll´ betrifft:
Weeß nadierlisch, was do war.
Les´ jo manschmol Fachzeitschrift`,
un denk´ meischdens linear:
Die ganze Welt versucht jo g´rad,
Schdrom noochhaldisch herzuschdelle.
In Rohrbach denk´ma separat,
probiere grad´ ganz ann´re Quelle.
Die Stromausfälle ware Teschts,
geplant, um ganz ball rauszufinde,
wie es uuhne Schdrom so lefft,
um ihn ganz zu iwwerwinde.
Isch däät´s jo gern e´mol so teile,
wär vielleischt ganz witzisch g´wese;
muss nooch d´Kerwe fiir ä Weile,
awwer g´nung Bleedheide lese.
Unser neier Gemeinderat
„Rischdungsweisend“ war des Wort,
des konnt ma iwwerall vernemme;
so wischtisch hier fiir unser´n Ort,
dass mansche Wahlplakat´ noch hänge.
Zum Glick blieb´ d´ greeschd Befiirschdung aus!
Die Leit´ wählde mit Augemaß.
Die Mitt´ schdellt´ sisch als Sieger naus.
Een Sitz hier un doo - des war´s.
Es wird´ sisch awwer zeige misse,
dass d´Leit aus värzehne Pardeie,
sisch net immer nur oapisse.
im Wahlkampf gab´s schunn viel´ Geschreie!
Isch fand des Wahlsystem mol gut.
Hält´s doch die Kloanere am Lewwe.
Doch bei der plurale Flut,
froog isch misch: muss da des häwwe?!
Des gleische gilt dem Jugendwahn
bei CDU und SPD!
Domit isch´s halt net getan.
Ma hott´s am Wahlergebnis g´seh´.
Beide z´samm`ä guudes Värddel
isch halt schwach – des wisst ´er aa!
Sie kennt´s noch annerschd, unser Käddel
als ihr (aa hier) noch Volkspardeie wart.
Dass griie, rot, gelb finf Sitz´verlier´n,
war klar, bei derre Lag´ im Land.
Net jeder konn´t doo profitier´n:
die CDU schdagniert beim alde Schdand. (Heidelberger)
Der Grieschnitt- Pouschd mit Keddesääg`
vun drei ganz Witzische - wie schlescht!
Wär besser, wenn ma iwwerlegt,
bevor ma sou än Scheißdreck mäscht!
Ansunnschde sin viel Alde fort,
fiir einische war´s escht keen Schbass.
Beim Lischdeplatz net viel Support.
Doch manscher säschd vun sisch: Des war´s!
Grad mir in Rohrbach werr´n vermisse,
zwee, die schaffde, uuhne Schrange!
Ihr habt so lang ganz viel gerisse:
Werner, Karl: Macht´s gut un Danke!!
Mir häwwe halt koa Geld!
Es isch net oafach in ner Redd´
komplexe Sachverhalt´ zu dischde.
Manschmool werd´s vielleischt verzerrt;
muss hier un doo uff d´Feinheide verzischde.
Zum Beischbiel isch ma jo schunn klar,
im Haushalt gibt´s so mansche Pflischd`.
Doch´s Narrativ wer´d offenbar:
im Kern isch´s wohr, aus meiner Sischt!
Un weil´s so isch, des sag´ isch laut:
Trotz mehrmoolischem Schreiwe;
hott´ koaner sisch heit hergetraut!
Werd´s schbäder unner d´ Nase reiwe!
Mir häwwe hier so mansch´ Projekde,
allesamt sin uns sehr wischdisch.
Mir verwalde viel Objekde.
Hänge losse, isch net rischdisch.
Doch die Schdadt säscht: geht halt net!
Sorry, wenn´s eisch net gefällt.
S´werd´ grad enger, des Korsett.
Brauche fiir was anner´s Geld.
Im Kulturhaus solle ball
viel Veroaschdaldunge sei!
Doch´s OG isch im Zerfall.
S´missde awwer Umkleid´ nei!
Doch die Schdadt säscht: geht halt net!
Sorry, wenn´s eisch net gefällt.
S´werd´ grad enger, des Korsett.
Brauche fiir d´Kuldurhauptschdadt des Geld.
Die Plän´ fiir d´ owwer Rathausschrooß
sin seit viele Johr´ so weit.
Die Schlagläscher sin medergrouß,
die Umgeschdaldung an der Zeit.
Doch die Schdadt säscht: geht halt net!
Sorry, wenn´s eisch net gefällt.
S´werd´ grad enger, des Korsett.
Brauche fiir´s Kongesszentrum des Geld.
Eischedorffplatz, Chapel, schunn erwähnt,
es gääb´ so viel´ Notwendischkeide.
Sin in Rohrbach net verweehnt.
Schdändisch miss´ma dofiir schdreide!
Doch die Schdadt säscht: geht halt net!
Sorry, wenn´s eisch net gefällt.
S´werd´ grad enger, des Korsett.
Brauche fiir de Bahnschdadt-Tümpel unser Geld.
Unner´m Schdrisch werd´s offenbar:
Mir dunn nix Uumääglisch´s ordern.
Die Prios zu verschiewe: ja!
Kann ma glaaw´isch schunn ei´fordern!
Video Assistent Referee
Mir wollde s´ Summermärsche feiern,
zum Deil isch´s uns jo aa gelunge.
uff Plätz, beim Gockler un in Scheiern
ham´ma g´fiewert un aa g´sunge.
Des Aus war uuverdient, verschowwe!
Es war ä Drama, uuhne Zweifel.
Am End´ do ware d´ Sponnier howwe,
un Unseri ä Elend- Haiffel.
Fehler gab es, gibt´s, werd´s gewwe,
will do gar net lamentier´n.
Es gheer´t nun mol zu unser´m Lewwe,
mol zu g´winne, mol verlier´n.
Doch es ging ma uff de Geischt,
des VAR- Gefätze, was än Scheiß!
Der Ball im Door, oanjeder kreischt,
dann kummt da dabbisch VAR-Beweis.
Des mäscht de Fußball ganz kabutt,
jeden Mischd zu iwwerpriife.
Wenn da VAR druff gucke dutt,
ob d´ Fiißnäggel ins Abseits liefe.
Des Ziel davuu, ma kann´s verstehn:
Gereschdischkeit zu maximiere.
Es funktst halt net, mir hawwe´s g´sehn.
Drum schafft´en ab fiir d´nexschd Turniere.
Mir hawwe eh de Fußballgott
als Korrektiv, der´s iwwernimmt,
seit 66 England Schbott,
un domit G´reschdischkeit z´rickbringt.
Seit nuu´meh 58 Johr,
wisse mir doch alle hier,
der Ball war niemols drin im Door.
Mir brauchde nie än VAR däfiir!
Zum Händ´ iwwerm Kopp z´ammeschlaache!
In oanem Johr begegne uns
so mansche Kuriosidäte.
Ma denkt sisch als: oo Kerl, oo Blunz,
wenn mir immer so schaffe dääde!
Einische bassiere doo,
ergewwe sisch bei uns im Ort.
Annere, die liest ma so
un schmeißt am liebschde d´ Zeidung fort.
Es gäb nadierlisch dausend Fäll`,
die basse bei der Iwwerschrift,
Ich hab´ mol finfe z´ammegschdellt,
wuu´d oan des anner iwwertrifft.
Isch fang mool mit de Ämder oa,
die uns schdets liebevoll begleide;
un modiviert, nie hinnedroa,
mit Sachverstand an d´Ärwett schreide.
Um´s glei zu saache, des isch klar,
es geht hier nur um 3-4 Leit´.
Än Groußdeil mäschd des, ja sogar,
isch kann´s net allerschd saache: g´scheit!
1) Doch d´ oane dausche eefach so
in d´Eischedorffhall` alle Schlässer.
B´scheid zu gewwe: Quatsch, iwoo!
Die Iwwerraschung isch viel besser.
Der Seilzug un die Vorhangschdang-
war´n oans Daags schburlos verschwunne.
Geklaut? Entfiihrt? Mir wurd ganz bang!
Hot´s oaner bei der Tombola gewunne?
Joo, isch hab´ den Fehler g´macht!
War mi´m Kopp halt net däbei:
„Erscht werd g´handelt, dann gedacht!“
Woaß es jo, isch ma net nei.
Erscht mäscht ma´s weg, dann guckt ma mol,
wer´s iwwerhaupt vermisse dutt.
Wenn´s oaner merkt, dann heeßt´s gleischwohl:
„des dauert jetz´, war halt kabutt.“
Beim Mardinsumzug koschdet´s Klo
in d´Eischedorffhall´ hunnert Öcke.
Es schebbert wohl! dann mach´ ma´s so:
Eefach hinnerm Busch verschdecke.
2) Des Hochbauamt hott´ ä Idee:
Ma geht jo immer mit da Zeit!
Heizunge: längschd obsolet,
doch worscht, wenn´s drauße friert un schneit!
Sie wollde uns, stellt eisch des vor,
die Chapel uff´m Hoschbidal,
vermiede iwwer´s ganze Johr,
als Kaltraum! Klar, lefft kolossal!
3) Der letzschde Fall hier aus der Schdadt:
im Karlstorbahnhof bumbt da Bass.
Die Oawuuhner, die hawwe´s satt:
„So mäscht des Leewe dort keen Spass.“
Wie immer hab isch erscht gedenkt:
„Ihr wolldet hiie - jetz´ haldet´s aus!“
Doch dann hab isch schnell ei´gelenkt:
„Es war net klar im Vornenaus.“
Ich froog misch escht, 20 Million!!
die in des Karlsdoor g´flosse sin.
Kriegt ma doo escht kee Konschdruktion,
mit oaner g´scheide Dämmung hin?
4) En Trainer bei Olympia,
seschd im Gefescht mol: „Halt die Fress!“
uff oamol kumm´ se, isch jo klar:
d´ Moralaposchdel un die Press´.
Herrgott, noa, wie misch des nervt!
Immer, iwwerall korrekt.
Immer d´Goldwoog, die verschärft.
Froog misch, was dohinnerschdeckt!?
Sin´ vermudlisch diese Leit,
die des net bewerde kenne,
weil se´ halt zu jeder Zeit,
beim kleenschde Scheiß´oa´fang´zu flenne.
Als Kind beim Fußball z´letzschd gewählt,
liewer g´motzt, als was ertraache.
Sisch net johrelang´ gequält,
um ne´n Sieg davuuzutraache.
ZDF un ARD,
zeige koan Medailleschbiegel.
S´ werd mit: „Leischdung muss doch koaner seh“
un „d´ arm´ Verlierer“ abgewiegelt.
Die Haldung fiihrt zu, sehe´s jo:
Deitschland wer´d ganz schdedisch schleschder.
Wennischer uff Topiveau:
Ganz dramadisch bei de Feschder.
5) Mir alle saße b´schdimmt schunn mol
uff nem Kinnerkarussell.
S´isch fiir´s Volksfeschd ä Symbol,
die Kids finde´s sensationell.
Doch isch muss eisch doo was saache:
„Losst eisch net däzu verfiihre.
Guckt, dass d´Kids in d´Fahrzeig fahre
un verschont die arme Tiere!“
Kennt´er net die Konsequenze,
wenn se mool uff d´Tiere g´sesse?!
Sie entwickeln bees´ Tendenze:
Tiere nutze, Tiere esse!
Die PETA will, des schdimmt komplett,
die Karusselltiere verbiede.
Uufassbar, als hätt´ ma net,
Soorje uff ganz annere Gebiede.
Isch nemm´ den Satz als Iwwergang
um misch de greeschde zuzuwende.
Beend´s Kapitel; ja, s´war lang.
Doch d´Wahnsinn hott´ halt aa koi Ende!
Oan Johr noch! …
Sie isch in G´fahr wie lang nimmie:
Unser deitsch´ Demokratie.
D´ Ambel dutt sisch do ganz schwer,
rennt der Entwicklung hinnerher.
Schdatt Problemlösung` kreiert,
wurd, wenn´s hochkummt, reagiert.
Leider aa zu viel verpennt,
beim rot-gelb-griie´ Experiment.
In oanem Johr isch des vorbei,
s´weist all´ druff hiee; es werd´ so sei!
Die Europawahl schun mau,
Landtagswahle: Super- GAU!
Verluschd´ vun Mehrheid´, Druck vun auße
Die nner´ Sischerheit: zum Grause!
Ihr seid dann an eisch selwer g´scheidert:
Schdändisch Schdreit, zu viel blockiert.
Eire Prios kaum erweidert,
un soo schlescht kommuniziert.
Die Ideen, net immer schlecht,
un aa viel` Verschbresche g´halde.
Unnerm Schdrisch werrn d´ Leit zurecht.
Des Versäumd´ im Kopp behalde.
Habt eisch oafach iwwerschätzt,
bei manscher Kris` de Kopp verlor´n.
Teils die falsch´ Akzende g´setzt.
Hier ä paar Indikator´n:
Die Haushaltsschdreits – was will ma saache!?
Neiverschuldung, taktisch` Kniffe.
Alles wurd´ nach drauß´ getraache,
dann ham´ d´G´rischde ei´gegriffe.
Die wärtschaftlische Schdagnation
isch ä riesisches Problem.
Dem Birjergeld fehlt d´Relation.
Viel´ Betrieb´, die pleide geh´n.
Kiffe isch jetzat legal.
Än johrelanger Traum wurd wohr
fiir´d 68er!... Egal,
dass viel´ Experde warne d´vor!
S´ Compact-Verbot wurd revidiert!
Gut gemoant, doch schlecht gemacht!
Die Minischderin blamiert,
dänooch mit d´ FDP verkracht.
Monnem, Solinge: wie schlimm!
Es misse endlisch Leesung her.
Nur klari Konsequenz mäscht Sinn,
aa hier hinkt d´ Ambel hinnerher.
Mansche Maßnahm` uuhne Planung:
Des Verbot vun lange Messer!
Sorry, klingt nooch wennisch Ahnung.
Doodursch werd rein gar nix besser!
Koa G´schbür, wie immer, bei de Bauern,
nur uff d´Sachebene g´schwätzt.
Beim Verschdändnis: hohe Mauern
un net g´scheit aus´nannerg´setzt.
Des schlimmschd´ Versage, hab´s erwähnt:
Zu wennisch Leit´ mitei´bezoge.
Doodursch viel´ vun d´ Mitt´ vergrämt,
die sin nooch reschds un links gezoge.
In Sachsen un in Thiringe,
do misse se´s jetz´ ausbade.
CDU un Linke ringe,
fiir de kloanschd määglische Schade.
Jetz´ kann Sahra Wagenknecht,
Höckes AFD nur schdoppe.
D´Ambel so uufassbar schlescht
Des BSW konnt` alle toppe.
In Frankreich nooch d´ Europawahl,
zog Macron die Konsequenz`.
Aa fiir Biden war´s ä Qual
zu akzeptier´n: „Bin an der Grenz“.
Net bei uns, Scholz bleibt ganz cool:
„Leeft doch supper, wunnervoll.
Bleib hier hocke uff mei´m Schduhl,
bin charismatisch un ganz toll!“
Nooch Potsdam hott´ ma jo gedenkt,
die Mensche hawwe´s jetz kabiert:
dem Extremismus werd´ nix g´schenkt,
un viele Demos durschgefiiehrt.
Es gab sie aa in Heidelberg.
Dausende war´n uff der Schdrooß.
Gege d´ AfD, verschdärkt:
„Der Reschdsruck isch im Land zu groß.“
In Heidelberg net ganz so sehr.
Ä paar Hanselin gibt´s hier.
Manschem fällt n´ Mietvertrag schun schwer.
Es braucht´ mol vier Versuch´ dofiir.
Än anner´ setzt sisch grad zur Wehr
gege ne´n Vereinsrauswurf.
Formale Fehler hie un her,
Sie woll´n disch net! Drum kratz´ die Kurv`!
Vor Gerischt habt´er den „Mumm“!
Hätt´er den doch mol besesse,
eisch beim Speeddating dodrum
oagemeldt´, statt´s zu „vergesse“!
Glaab jo immer noch ganz feschd:
Besser schwätze, iwwerzeige!
Un net ausgrenze vum Reschd.
D´ Wahlergebnis´ dunn´s uns zeige.
Liewi Ambel, seid so gut,
bringt des Johr noch gut zu End,
die Lage isch g´rad escht akut.
Verännert eisch: werd´ kompetent!
Epilog
Es gäb` noch souviel zu verzähle,
doch alles hot emol e End.
Jetzat wolle mer d´ Gorjel eele,
weil´s jedem schunn im Hals drin brennt.
Auf ihr Leit, des werd der Hit:
mir gehe z´samme vor zur Hall.
Des Portemonnaie nemmt´er schee mit,
sunscht werd´ doch eier Geld net all!
Mir losse´s mol so rischdisch krache!
sin jetzat mol drei Daag lang froh.
Ihr braucht eisch heit kee Sorje mache,
die sin am Muundag aa noch do!
Un kummt´er dann e´mol net weider,
wenn´er nooch der Wohrheit forscht:
verzweifelt net! Kummt, des isch g´scheider,
zu mir, zu eierm Kerweborscht!