Die Kerweredd 2020
von Konstantin Waldherr
Hallo mit´nanner liewe Leit
Isch will eisch ganz besunnerschd grieße!
Zu unser all Bedauern misst´er heit
die Redd vun eisch dahoam aus nu genieße!
Nischds desto trotz geb isch ma Miieh,
ä Kerweg´fühl zu transportiere;
muss allerdings, trotz massisch Fantasie,
d´ Begriießung doch ä bissel variiere!
Liewer Guschd, sei ma net bees!
In dem Johr macht es halt keen Sinn:
Dass isch dei Worde hier verles,
es isch zu viel, was net isch, drin!
Im nexschde Johr, wenn ma dann widder,
vor´m Rothausplatz versammelt sin.
Bei Wei, Gesellischkeit un Lieder,
erschalle se zum Feschdbeginn!
Geht jetzat mit ma uff ä Reis,
durch Gschichte, die uns all bewegde.
Un uns uff irgendoani Weis,
positiv un negativ uffregte!
Klar, im letschde Johr gab´s viele Krise
Ereignis´, die uns traurisch mache!
Viel zu schenne, doch aa e Prise
vun Umständ, ja, do könn ma lache!
Isch frei mich, wenn´s dann widder mol därf sei:
Mi´m een un annere zu diskutiere!
beim Glässel Wei, okay: bei drei!
denn isch werd jetzat vieles kritisiere:
Rickblick
Die Kerwe 2019 - en Startschuss wurd g´setzt!
Es war vieles annerschd, es war vieles nei.
Die Platzkerwe wurd durch´s Strooßefeschd ersetzt,
es gab viele neie Kerweverei`!
Im Rickblick war´s e schäänes Feschd
Programm, Konzept voll oagenumme!
un für de erschde Härdeteschd
sin zimmlisch viele Leit` hiikumme!
Klar war`s bleed: d`Schausteller und s` Wetter
hawwe uns im Schdisch gelosse!
Nadierlisch is e Feschd kompledder,
mit Karussell un Wurfgeschosse!
Doch was willsch saare: stecksch manschmol net drie!
Du kannsch nur plane, mache un dunn!
D´Schauschdeller schickt d´Stadt Heidelberg hie,
un wenn er will, schickt Petrus die Sunn!
Ansunnschde war doch alles dabei:
Musik, Kultur, Tanz, Tradition,
Geselligkeit, Freude, gut´s Esse und Wei:
Ä wirklisch perfekti Kombination!
Ihr seht, am End bleibt´s Positive,
was net lief, kriegt ma z´amme hii,
doch Leits, die schlicht vor Dummheit triefe:
do hilft halt gar kee Therapie!
Die destruktiv un ohne Peilung,
u`gefroogt des Maul uffreiße;
un ihre iwwerfliss`sche Meinung
feig im Indernet verbreide!
Kee Fingersche krümme un gar nix beitraare!
ständig nur motze, ganz abgedrosche!
Losst eisch vun mir doch des jetztat saare:
Macht´s besser odder haldet doch eefach die Gosche!!
Des wischdigschde Amt iwwerhaupt!
Heidelberg- die Feiermetropole.
Nirgendwo geht´s ab wie hier!
Partyhopping laudet die Parole.
Jedi Nacht geht´s ab bis vier!
Die Wahl fällt dobei zimmlisch schwer:
geht ma in Kneibe, Clubs odder Bars,
Großraumdiscos, Open-Air,
die ganze Stadt besteht aus Spaß!!
Do isch´s nur g´scheit es so zu mache,
wie´s manschi Partygroßstadt mäscht
Mannem hot oaner: s´wär doch zum Lache:
Mir brauche aa en Schdar der Näschd`!
Mit hunnert Discochefs verhandle:
Des - kann wirklisch nur en Greeschder!
genervte Oohwuuhner zu Feierbieschder wandle:
schafft nur en eschder Birjermeeschder!
Isch schalt die Ironie mol aus,
in Wohrheit kocht ma faschd des Blut,
ee Frog stellt sisch mir do durchaus:
geht´s uns hier eigentlisch zu gut?
Was will der Birjermeeschder schaffe?
Bei g´fühlt drei Bars un Partyzelde!
Oaspruch un Wirklischkeit: do klaffe -
in Heidelberg mol widder Welde!
O´Reillys, Nachtschicht un die Halle
Ziegler´s, Schwimmbadclub un Cave
Erinnerung` vun uns all verfalle
in surreale Winderschlaf!
Mit Sischerheit gibt´s viel` Ursache:
Corona, Tinder, hohe Pacht!
doch scheint es so, als däätsch nix mache:
Heidelberg, du Stadt der Nacht!
Naja, der Neie kann dann ganz bequem,
gechillt un mit ner Seeleruh,
Chai Latte in Hotelbars schlürfe gehn!
die hawwe (zumindescht noch net) zu!
„Die Eigeborene vun HD-City“
Mir ware mol ä middler Städtsche,
net viel zu grouß un net zu klee!
Ganz viele wusste des zu schätze;
grad diesen Umstand fand ma schee!
Doch seit ein´sche Johre gibt´s de Trend:
noch immer heeher, schneller, weider!
Isch glaab, dass ihr eisch do verrennt:
Sehr verehrte Stadt- Entscheider!
Heidelberg gebärdet sisch als Metropole!
`sin nur noch Wuuhnung´ un Großprojekte wischdisch,
es scheint, als wollt´ ma alle iwwerhole!
Heidelberg war friiher - „HD- City“ heeßt´s jetz rischdisch!
Dobei verliert ma aus em Blick:
Was wollen eigendlisch die Leit?
Än Großteil wünscht sisch Heidelberg zurick!
HD-City nur ä Minderheit!
Isch weeß nadierlisch schunn:
es isch der Lauf der Zeit!
Urbanisierung gibt´s jo schließlisch
seit ner halwe Ewigkeit.
Mir geht´s an sisch net drum, des Wachse Heidelbergs zu kritisiere!
Sondern nur, dass einische vun eisch des „wie“ aus de Aache verliere!
Es gibt dafiir so mansch` Indikatore:
Isch nenn e´mol zwee odder drei:
die hier wohl wesentlisch` Faktore:
Verkehr, Kultur un s´Gfiihl miteibezoge zu sei!
Mir hawwe se net, egal ob´s uns g´fällt:
ä Infrastruktur, stadtentwicklungskonform!
eespurisch naus ins Neuenemmer Feld!
Kee Parkplätz, d´Verkehr entsprischt net der Norm!
Mi´m Klimabirjermeeschder kummt des jo ins Lot!
In Dresden gab er entnervt uff:
„dort sin die Leit zu altbacke fiir Fahrverbot!“
mir in HD-City stehe (scheinbar) rischdisch druff!
Die Stadtteil´ hotte friiher noch dörflische Charakter!
zum Glick: so manscher hot´s noch immer!
trotzdem: irgendwie werd´s viel abstrakter,
ä G´fiihl vun Heimat: bei viele – nimmer!
Mir hawwe insg´samt hunderte Verei´,
sie trage all den Großteil der Kultur!
Doch scheint´s oft net genung zu sei!
Vun Oaherkennung kaum e Schpur!
„Kultur: die braucht ä großes Publikum;
muss wirke, am beschde stadtgetraache!
Theater, s`Interkulturelle Zentrum,
vielleischt ´s DAI- do muss ma danksaache!“
Mir fällt do glei e Beischpiel ei,
isch kann´s noch immer net ganz fasse:
lässt ma derzeit liewer Halle frei,
als Chöre do drin prowe zu lasse!
Uff jedi Nochfroog oder Bitte,
wobei ma iwwer d´ Notlag´ informiert!
Heeßt´s: „en Chor in d´Sporthall´ isch kee Sitte,
die sin fär d´ Sportvereine reserviert!“
Zum Glick baue se grad s´Hospital um!
vielleischt gibt´s do ä Alternative?!
Naja, dass dort was außer Wuuhnung` hiikummt,
glaabt aa nur noch der ganz Naive!
Des- un der Vorzeig´stadtteil PHV
ja, sowas Großes bringt Prestige!
Investore, Geld, Publicity,
nadierlisch nur mit souwas ziehsch`!
„die alde Stadtteil´ solle doch net motze!
es profitiere all davuu!“
bei so´äm G´schwätz do könnt isch kotze!..
do leg isch ab - die Samthandschuh`:
„die alde Stadtteil“ zahle nu die Zeche,
vun Ochsekopp-Farce un Beiderlinden-Lobbyischde!
Wieblinge, Rohrbach, Keersche solle blesche?
un fiir eiern Ruhm die Drecksärwett verrischde?
Mir sin bestimmt net eier Spielball,
der wischdisch is, nur wenn´s eisch basst!
sin doch für Heidelberg en Glücksfall,
un so en Scheiß isch uns verhasst!
Beim Schreiwe muss isch ständisch do droa denke!
Än Hauch vun gleisch´ Motive isch vermut:
De Ei´geborene vun Trizonesie G´heer zu schenke-
ä paar Passage basse (umg´schriwwe) eefach nur zu gut!
-Ä kleenes Heifle Birjermeeschder
macht heit die große Politik!
sie schaffe Stadtteil´ immer greeßer
Un was isch hier mit uns im Aacheblick!?
Mir sin die Eigeborene von HD-City!
Hei-di tschimmela tschimmela tschimmela tschimmela bumm!
Hawwe Kultur, Humor, sin gscheit und ziemlisch pretty!
Hei-di tschimmela tschimmela tschimmela tschimmela bumm!
Doch anstatt´er des im Kopp habt!
Plant´er liewer euer Snob-Stadt!
Mir sin die Eigeborene vun HD-City,
un däte wirklisch liewer Heidelberjer bleib´n!!
Free die Bach!!
Mir laafe gern in Rischdung Wald,
erhole uns vum ganze Krach;
Entspannung pur, Natur geballt:
d`Veegel zwidschern, es rauschd die Bach!
Seit Johresoafang isch´s bekannt,
Herrgott noa, was muss ma seh`?
Barriere, Schrangge, Absperrband!
ma kann nimmie zum Bach hiigeh´!
Es gibt keen Hiiweis un kee Schild,
was ma sisch dobei hot gedacht!
ma war jo oafangs noch gewillt,
zu glaawe, wärd was in Schuss gebracht!
Doch s´isch mol widder nix bassiert!
die Zeit verschdreischd, die Stadt dutt triele.
un wie´s so isch: s´Grücht kursiert:
der Grund sei, weil do Kinner spiele!
Des wär nadierlisch ä starkes Stick,
denn Kinner brauche die Nadur!
erinner` isch misch gern zurick:
mir spielde, lernde in oaner Tour!
Der Fake-Bach hier in Rohrbachs Kern,
is nice to have bei Eis un Sunn!
Isch weeß, sowas isch sehr modern,
hot mit die Bach doch nix zu dunn!
Er g`hert zu uns un mir zu ihm
jetzt regelt mol ganz schnell die Sach`!
Barriere sin net legitim;
drum weg damit - un free die Bach!
Selwer schuld!
Isch hab`s noch im Ohr, „wie kann ma des mache?
Der zieht des hier durch de Kakau,
en Kronkorke entscheidt, s`isch net zum Lache“!
Mei Meinung isch: „doch! Mit Radau!!“
D´Abstimmung zum Ochsekopp: e eenzische Farce!
Der Birjerentscheid nur Makulatur.
Heidelbergs Schwäche: Leutzingers Spaß;
Leit´s, sei Kerngschäft is Karikatur!
Der Mann isch vun ner Spaßpartei,
der soll un will jo provoziere!
Er därf halt net des Zinglei sei!
Wenn´s so weit isch, kannsch nur verliere!
SPD, CDU, Heidelberger, FDP
Lange net um d´Mehrheit zu erlange!
Selbscht mit Freie Wähler un OB!
Heidelberg: was willsch verlange?!
En Trend, der schun seit Johre geht:
Der Wähler, der de Blick verliert!
D`Sinn vun Kommunalwahl net versteht
un eefach s´ Wesentlische net kapiert!
Es geht bedingt nur um´s Globale
un um die Bundespolitik.
Im Fokus steht des Regionale,
uff Heidelberg liegt hier der Blick!
Experde werre abgewählt, obwohl gerade eben diese,
Sisch johrelang die Ärsch uffgrisse.
In ner Pardei zu sei, die im Trend isch, langt als Expertise!
Hot doch awwer so manscher vor korzer Zeit in d´ Hos noch gschisse!
En Großteil mit sisch selwer ringt,
es geht um d` eigne Hemisphäre.
S´ Interesse für viel` Bereisch´: bedingt!
Sorry: isch kann´s ma annerschd net erkläre!
Isch hoff die Gschicht mi`m Ohkunftszentrum
werd net der restlisch Amtszeit Menetekel
Isch laber gar net lang drum rum:
Doppelmoral verschafft mir Ekel!
Für´d nächschde Johre hoff isch nur:
dass ihr eisch dann mehr interessiert,
fir Brauchtum, Tradition, Kultur,
und d´ Mensche aus de Aache net verliert!
Wunner gibt´s halt immer widder
Schun Katja Ebstein hot´s gewisst,
dass es sie immer widder gibbt,
seit letschd Johr sagt gar n´Atheist:
„ah doruff hätt´isch net getippt!“
Die siwwe Wunner der Antige
war´n dagege eher wahrscheinlisch!
die Ungarn 54 besiege:
logisch! war doch augescheinlisch!
Kinners, es isch wirklisch wohr!
Ma hott´s nimmie erwarde kenne!
Wenn ma die Hoffnung aa verlor,
un sie die nexschde Frischt verpenne!
Es war so unerträglisch nervisch,
jeden, wirklisch jeden Dag
omnipräsent, allgegewärtisch
in Tagesschau un Fachverlag!
Doch sei´s nun drum, es isch vorbei,
der Brexit isch Realität!
Fangt gar net ooh mit Heilerei,
denn dofür isch´s jetzat zu spät!
Ihr wärt doch besser dringebliwwe!
uff Dauer werded´a verliere;
doch ihr misst jo wie Null Null Siwwe,
d´ Komplexe ständisch iwwerkompensiere!
Ihr habt jetz nur noch die Option:
bei Trump un Putin ohzubiedern!
am Ende der verdiente Lohn,
isch hoff fir eisch, dass sie es net erwidern!
Ihr wolldet mehr sei, als er seid!
Zurick zu längschd vergangne Daare.
Verklärt net die Vergangeheit,
un lernt die Gegewart nu zu ertraare!
„Gut gedacht, schlecht gemacht“
Aus eem Aspekt hab isch´s verschdanne,
dass d´Referendum domols so verlief!
Die Britte sinn aa deshalb gange,
lääft in d´ EU doch ein´sches schief!
Die Idee „Europa“: eefach nur genial!
Vielleischt die bescht in d´Gschicht´ der Welt!
Die Umsetzung awwer suboptimal!
s´gibt vieles, was mir aa net g´fällt:
So manches Land genießt die Vorteil´,
will dofiir awwer wennisch gewwe:
zum Beispiel wollt domols en Großteil,
ä Hand voll odder gar kee Flischtling´ nemme!
Die Geldzuweisung´ nimmt ma gern!
un wehe, wenn ma die verringert,
werd Deitschland immer ganz dezent,
an sei Vergangeheit erinnert!
Ä gemeinsam, solidarisch´ Strategie,
braucht´s in alle Politikbereische!
Sunnschd bleibt Europa Utopie!
dann kannsch zusamme nix erreische!
Die Uschi kann nur lamentiere!
hot doch kee wirklisch´ Position,
wenn Orban und anner´ konterkariere,
die ganz europäisch´ Integration!
National` Intresse därffe jo besteh!
Der Mittelweg wär hier ganz groß.
Isch sag´s awwer klar, dass ma´s versteht:
Europa isch kee Ei`bahnstrooß!
Vielleischt hilft d´ Präsidentschaft jo im Rat,
zu lenke, gestalde un zu duu!
Dass uns der Satz doch bleibt erspart:
es gab mol was, des hieß EU!
Des U´vermeidlische
Der Johresoafang war schun b´schisse:
die Schande vun Hanau, die Thüringen-Posse,
Sturm Sabine hot Dächer abg´risse!
doch dann wurd der Bock endgüldisch abg´schosse:
Was will man iwwer Corona berischde,
nach demm, was war, in dem do Johr?
Klar hängt´s zum Hals raus, dät aa gern verzischde!
(Naja) Isch geh mol analyddisch vor:
Die wischdigschd Froog vun allenne werd sei:
Was nemma mit, was werdde´n bleiwe?
War sogar was Positiv`s dabei?
Was därffe ma in Zukunft nimmi treiwe?
Mir fange mol mi´m Positive ooh:
Fir misch die wischdigschde Erkenntnis:
Die meischd Leit hab´n, Gott bin ich froh,
was in der Bärnn un viel Verständnis!
Es isch zum Glick de meischde klar:
die Einschränggunge u´erlässlisch!
egal, wie schwer es manchmol war,
der Großteil bleibt doch sehr verlässlisch!
Ä anner positiv Entwicklung:
wie Merkel, Kretschmann hier regiere!
Ok, isch muss in manchem Punkt,
die Redd vun letschd Johr revidiere!
Der Z´ammehalt in Rohrbach: was willschen mehr?
So schää, wie hier all z´sammestande!
Stadtteilverein, Fandango, Maschgenäher!
un viele hier noch U´genannde…
Videochats sin net des Gleiche,
doch im Notfall geh´n se aa!
Vielleischt lässt es sisch jo erreiche,
dass ma se nutzt, so ab un aan!
Denn schließlisch muss es doch net sei,
fir zwee Stund G´spräch nach Washington zu flieje!
Wenn ma bequem, CO2- Ausstoß-frei,
dahoam was schafft, der Umwelt z´liebe!
Isch hoff, ma könne endlisch doraus lerne:
Dumpinglöhne, Zeitverträg und Leiharbeit
aus der Arbeitspraxis zu entferne!
Dofiir isch´s jetz heechschdi Zeit!
Ma merkt´ erscht in de letschde Zeide
wie abhängisch mir vun annere sin,
Medikamente, Technik, Produkte um weiterzuarbeide,
manchmol mäscht Deglobalisierung aa Sinn!...
Klar: in Erinn´rung bleibt des Negative!
Bei mansche Leit, do langsch´da an die Bärrn!
Der Owwerschde der Ami- Exekutive
kriegt ä eige Kapitel, bei so viel Härrn!
Ma denkt an all die ganze Freaks,
Verschwörungstheoretiker un Leugner!
Besserwisser, „Auserwählte“ mit Aluhiit!
„Verfassungshiider“ un „Sisch-niemols-Beuger!“
„Covid 19 kummt vun Merkel, Bill Gates will uns all versklave!
Impfdiktatur, 5G, Marsianer; oh es gab viel zu entlarve!
Theoriee` so schlecht und allem entgeje,
wennischer wohr als die meischde vun Grimm´s Määrsche
doch een Umstand langt, um all zu widerleje:
sie glaab´de des Ganze noch net e´mol in Keersche!
Unser Regierung: ä Paradediktatur und machtverliebt!
d´ Reschde uffs Tiefschde oagegriffe…“
Naja: Ä Diktatur, die freiwillisch Reschde z´rickgibt,
wär zimmlisch b´schisse un hätt´s Prinzip net begriffe!
In Erinn´rung bleiwe all´ die Egomane
die Nudeln- Mehl- und Klopapier horde!
Vor Bedürfdische, Alde und Kinner absahne,
„Ihr seid so geil, eisch g´hert alle en Orde!“
Doch die mit Abstand eklischst Aktion,
die Mensche werre wirklisch immer dreisder:
do klaue se Mittel zur Desinfektion,
am hellischste Dag aus Krankehaiser!
Nadierlisch gab´s noch viele Pfoschde:
Partygänger trotz Corona, Leit, die sisch bereischerde!
Regierungschefs, die ihr Volk viel koschde!
Do wusst vor allem oaner „zu begeischdere“
„Godfather of America“
„Make America great again“!
hieß es mol, vor langer Zeit.
Sie ware dem noch nie so fern,
verspürt ma derzeit eher: Mitleid!
Dass die eenscht mäschdigste Nation der Welt,
in Militär, Wirtschaft, Demokratie,
irgendwann mol so tief fällt!
Es fiihlt sisch ooh wie Utopie!
Wirtschaftskrise, Ärwettslosischkeit,
e komplett geschbald´nes Land!
die meischde Infizierde weltweit,
Herrje, wie hawwe se sisch verrannt!
Außepoliddisch ä tickendi Uhr,
ma agiert, mit Verlaub, net grad klug!
Vun Multilateralismus un Verlässlichkeit kee Schpur!
Raus aus WHO, INF, Paris dazu: Truppeabzug!
Un was mäscht der große Kriseverwalder?
Naja, er mäscht halt alles schlimmer!
Des Pudels Kern, der owwerschde Spalder!
Vun Diplomatie halt gar keen Schimmer.
Des schlimmschde is awwer: er fiihlt sisch berufe!
„Nur er hätt de Durschblick, nur er hätt Verstand!
kennt sisch iwwerall aus, in alle Berufe“,
wie Benjamin Blümchen, der Elefant!
Er diskreditiert die kluge Gouverneure,
„Desinfektionsmittel könnt vun inne wirke!“
ma könnt sisch noch ä Weil empöre,
es werd halt leider nix bewirke!
Liebe Amis, dutt uns doch den G´falle:
beendet im Spätjohr diese Chose!
denn noch 4 Johr zum Abgrund falle,
heeßt kollektive Zwangsneurose!
„all U´fähische are berufsu´fähig“
Mir hawwe´s grad jo schun mol g´hert
Ma kann´s genung jo gar net schätze!
In Krisezeide noch vermehrt:
Verfassung, Recht un unser G´setze!
Die Freiheit von Wuhnort, Beruf, Religion,
die Würde des Mensche und net zu vergesse:
des Rechtsstaats letschdi un treuschdi Bastion:
die Freiheit der Meinung, die Freiheit der Presse!
Sie muss ma mit allem Erdenklische schitze,
will ma in d` Demokratie verbleiwe!
Deshalb dutt`s so gar keenem nitze,
wenn Zeidunge domit Schindluder treiwe!
Die Freiheit heert nämlich do widder uff,
wo diese vun annere eigeschränkt werd.
Die TAZ-Dame meent: „isch geb`de Bolizei eener druff!“
So bleed; s`isch wahrlisch keen Pifferling wert!
Nadierlisch, Rassismus is eklisch un b`schisse
un mit Sischerheit gibt`s ihn in mansche Bereische.
Isch dät awwer gern e`mol vun ihre wisse:
Was will man mit so n`em Artikel erreische?!
Die ganz Bolizei zu diskreditiere!
Un sisch so dumm- dreist lächerlisch z´mache.
hot nix mehr zu dun mit gscheider Satire,
bei sowas könne nur Vollpfoschde lache!
Naja, ihr Vorbild war net so viel gscheider:
Die Dame der Plan-un Farblosigkeit,
Mensch SPD, machsch du als so weider,
versinksch´ im Nirwana der Belanglosigkeit!
Probleme der Amis uff uns iwwertrage,
ohne Not un viel zu pauschal,
do muss ma sisch doch als gescheider Mensch frage,
sin´d Folge vun so was net ziemlisch fatal?
Isch will jetzt net sage, ihr wart daran schuld,
doch wahrlich wurd´s durch eisch net besser!
Oppenau, Frankfurt un Stuttgart-Tumult!
Rassismus-Vorwurf als Potenziell- Erpresser.
Im Fall vun der TAZ-Dame sag isch salopp:
heer uff so än dabbische Scheiß zu schreiwe!
am beschde such´sch da än annere Job,
du bisch net fähisch! drum loss es bleiwe!
„Thieringens Retter“
Thieringe in da Regierungskrise,
so ä Wahl, die gab´s noch nie!
s`gibt kee Mehrheit, s `isch zum Schieße,
än eschder Priifstoi fir d`Demokratie!
Reschds un lings die meischde Stimm`!
die Volkspardeie ganz weit unne!
Minderheideregierung, Neiwahl: alles schlimm!!
es wurd kee gscheidi Lösung gfunne!
Uff e´mol riss der Himmel uff,
der große Retter kam mit Macht!
Den Schachzug hot sunscht nimmand druff,
nur dieser Held hot mitgedacht.
„Ich brauch keen Wählerufftrag zum Regiere,
fünf Prozent sin a genug!
Loss isch misch halt vum Höcke legitimiere,
meine Fresse bin isch klug!!“
Kinners, war des eine Chose,
peinlich, dämlich, jämmerlich,
Gott sei Dank ging`s in die Hose:
„Landesvater Kemmerich“!
Wie schun g´sagt: es war net leischt
die Motive net ganz u´erklärlich!
Hätt doch awwer en kluger Geischt
erkannt: die G´schichte is gefährlisch!
En Ränkespiel mit AfD,
dazu noch der vun´em Faschist!
des isch tabu, des därf net geh`;
en Dammbruch, insg´samt: großer Mischt!
Isch hoff, es bleibt en singulärer Fehler!
falls net: geb isch eisch d´Garantie:
versag´se nochmol: Pardeie un Wähler,
werd´s rischdisch schlimm fir d´Demokratie!
Borschtpokal
Isch hatt mol widder d´ Qual der Wahl
S´gibbt viele Leit, die en verdiene!
Wer kriegt´n heit de Borschtpokal?
Des Highlight fär so mansch Vitrine!
Doch soo lang musst isch net sinniere.
In dem Johr doch ä Ära endet!
Mir werre e Person verliere,
die sisch zum Glick net ganz abwendet!
Isch weeß, er geht mi´m schwere Herze!
hätt´s doch gern noch länger g´macht.
Doch mit der G´sundheit därfsch net scherze,
do mäscht ma nix meh uff Verdacht!
Es ware dann gut siwwe Johr,
in denne er hot viel erreischt!
fär alle Leit e off´nes Ohr,
des zu ersetze werd net leischt!
Die Uffgab` ware zimmlisch groß,
vor allem 16- s´ Jubiläum!
Vieles war sehr kurios!
misst zum Guschd nuff ins Museum!
Nadierlisch is er heit aa do!
un stellt fir´d Uffnahm alle Weische!
Vielen Dank un viel Applaus!
Isch därf Hans-Jürgen Fuchs de Pokal nu iwwerreische!
Liewer Hans-Jürgen, bleib wie du bisch!
un vor allem, uns erhalde!
Du weesch: es isch genauso wischdisch,
im Hinnergrund mitzugeschdalde!
Epilog
Es gäb noch souviel zu verzähle,
doch alles hot e´mol e End.
Jetzat wolle mer d´ Gorjel eele
weil´s jedem schun im Hals drin brennt.
Schnappt eisch ä Glässel un stoßt mit ma ooh,
bevor ma uns zum Abschied winke.
Seid net traurisch, s´ isch halt jetz so!
Losst uns uff Entfernung tringe!
Im nexschde Johr, do freit eisch dann,
wenn mir uns all hier widderseh´n;
in Kerwetracht un Feschd-Gewann`
werd unser Kerwe weidergehen!
Seht jetz die Beiträg der Vereine!
sie hawwe sisch viel Miih gemacht,
un´d Kerwe 20, wenn aa im Kleine,
zu eisch in eier Heim gebracht!
Bleibt g´sund un munner!
un vor allem: behaldet bitte eiern Dorscht!
Vun all dem geht die Welt net unner -
herzlisch – eiern Kerweborscht!