Die Kerweredd 2022

von Konstantin Waldherr

Konstantin Waldherr bei der Kerweredd 2022

Prolog

Hallo mit´nanner, liewe Leit,
isch will eisch ganz besunnerschd grieße!
Noch drei Johr der Enthalthaltsamkeit,
heeßts´: Kerwe widder voll genieße!
Egal vun wuu ´er alle kummt,
aus Rohrbach odder sunscht wuuher -
die Kerwe werd besunnerschd bunt,
genießt´s – es fällt beschdimmt net schwer!
Korz zu mir fiir´s Protokoll:
Dankschee Karin fiir´s Verdrede!
Net nur in der Stadtteil-Roll,
aa bei der Begrüßungsrede!
Der Kiddel ooa, der Hut isch uff,
des isch mei jährlisch Maskerade.
Jetz´ kriegt so manscher oaner druff.
In diesem Outfit gibt´s kee Gnade!
Denn heit bin isch der Kerweborscht,
der Vorschdand ruht mol fir ä Stund;
des heeßt: mir isch so mansches worscht,
was glei verlosset meinen Mund!
Es g´heert heit klar zu meine Pflischde!
Was net leeft hart zu kriddisiere,
wer´d eisch in Grund un Boude dischde!
däänooch könn´ ma politisiere.
Es scheint ma eh in denne Dage:
So manscher muss es widder lerne,
ä anner Meinung zu ertrage,
uuhn` sisch vum Oastand zu entferne!
Wenn´s eisch trifft, nemmt´s mit Humor,
ertragt den Hohn un Spott der Leit!
Un schbart´s eisch dann im nexschde Johr,
un macht´s bis do hiie halt mol g´scheid!

Iwwerleidung

Die Welt isch nimmi, wie se war,
die Zeidunge sin voll vun Krise!
Deshalb war´s fiir misch ganz klar:
Zurickhaldung isch die Devise!
Ukraine-Krieg, kee Energie,
Corona, Klima: nur am Rand!
Bei all dem basst kee Ironie.
Sie sin aa eschd net amüsant.
Der Fokus liegt uff dem was doo
in Rohrbach, Heidelberg bassiert
Gut, am End´, des gheert´sisch so,
werd` die Regierung aa rasiert.

Der Ort des Bösen?

Sie g´hert zu uns´re ältschde G´schischde,
e bissel heffdisch, doch aa schee.
Ma därff uff sou was net verzischde,
aa wenn´s net alle Leit` versteh`!
Mei Oma hieß so bis zur Hochzisch,
fiir misch also vun groaußer Relevanz;
die Sag` von (ca.) Seschzehhunnertfuffzisch,
die, vum Steinmetz Peterhans!
Er nahm en Stoi und trug behend,
den Klopper viele Meder weid;
bis hiie zu Rohrbachs heit´schem End
des hot die Kerch´mer net erfreit.
Des ging net zu mit reschde Dinge,
do gab´s droo iwwerhaupt keen Zweifel!
Die Kraft konnt ihm nur oaner bringe:
da Pederhans paktiert mi´m Deifel.
Seit dem gibt´s unsern Höllestooi
Friiher die Grenz´, heit isch´s Quartier
Des meischde gheer´t nooch Kerche noi,
naja, isch sag: uff´m Babier!
Seit korzem steht do ä Skulptur,
der Kinnschdler blieb der G´schischd faschd treu.
Sie zeigt – oh Gott un Drama pur:
de Deifel hinnerm Höllestooi.
Seit dem isch nix meh, wie´s mol war
des Wuuhngebiet steht Kopp desweje
des Beese war noch nie so nah!
do muss ma Widerspruch ei´leje.
Ma kennt´s jo: s´ werd sisch glei beschwert;
moralisch g´hert ma zu d´ Gewinner.
Seit langem sei ma uffgeklärt,
un denkt doch an die arme Kinner!
Was setzt ma domit fiir ä Zeische?
In Zeide vun Corona un „me too“,
Black lives matter, Klima un dergleische?
Hää? Was hot des domit denn zu duu?
Isch glaab, ihr habt´s net ganz kapiert,
trotz der Erklärung im Gedischt,
des die Skulptur danewe ziert,
der Dischder Janssen Peters spricht:

„Der Künstler, der dies sieht, der spricht:
Die Sache muss hinaus ans Licht!
Denn was ins Offene gebracht,
verliert die Illusion der Macht,
und was zuvor als tückisch galt,
zeigt sich in freundlicher Gestalt.
„Der Helle Stein“ steht somit hier
als lichter Treff für das Quartier.
Denn wo sich Mensch zu Mensch gesellt,
ist er es, der die Welt erhellt.“
Isch fiirscht jo, s´werd aa des net reische;
Oans bleibt eisch noch: dann geht halt fort!
Ihr könnt dem Höllestoi entweische
an eem´ viel heilischere Ort.
Ich hab` do glei en guude Tipp:
Wie wär´s mit Wolkekuckucksheim?
S´Schlaraffeland isch aa ganz hipp!
Do könnt´er ohne Beesheit sein.
Herrgott noa, ein schwachsinnischer Streit.
Fiir viele Leit, ä unnäädischi Laschd!
Die Kerch´mer dunn ma faschd schun leid.
Ok, isch heb´s hervor: nur faschd!

Wenn mir so schaffe dääde!

Ä Kerwe isch ä Riese-Gschäft,
glaabt ma´s Leit, des isch än Act!
Es zehrt schunn manschmol an de Kräft,
ma ahnt net, was dohinner steckt.
Vor allem macht ma´s newebei,
die Ämder soll´des honoriere!
Un net noch dauernd do debei,
die Planung bleed verkompliziere!
Nadierlisch gilt des nie fiir all`,
betracht` die Ämder separat,
un ja, so isch´s un kee Geschwall:
s´klappt sehr gut mi´m OB-Referat.
Doch dann kummt´s Amt fiir de Verkehr:
„beim Umzug uff de Gehweg` laafe!“,
mit Fahn`, zu dritt! Tja, des werd schwer,
vielleischt e´mol ä Brill eikaafe!
Mir wisse jo seit viele Johr,
mi´m Oatrag misse ma uns schbude.
Sunscht werd´s mit Schausteller net wohr,
dann hamma wieder kee Schießbude`.
Der Oatrag ging im Friihjohr naus,
ans Amt, wuu´s eigentlisch erleddischt,
doch nix bassiert, Woch ei, Woch aus,
egal, wie sehr ma d´Dringlischkeit gepreddischt.
Un wie heeßt´s dann im Auguscht?
„Oh, do will jo koaner kumme!?
Hätt´ isch des vorher doch gewusst,
hätt` isch ma mol die Zeit genumme!“
Kummt noch oamol der Bescheid
fiir´ ä Feschd ganz lang dänooch,
dann sin viel` nimmi bereit,
rennt halt ihr mol  hinnenooch!
Leit´s, mir hawwe viel Verständnis,
Iwwerlaschdung, Personal,
doch irgendwann braucht´s die Erkenntnis,
sunscht werd´s Schaffe zu ner Qual!
Mir hawwe uns ganz lang gebrüschded:
„Schdadt mi´m schlankschd` Verwaldungsapparat!
Es isch die Zeit, dass ihr uffrüschded,
vorbei, dass ma an d´ falsche Ecke schbart!

Dummes G´schwätz

Des nexschde Thema, nur ganz schnell,
an sisch, ä wirklisch gut` Idee!
Führ´s net lang aus, isch zu schbeziell:
Jeder Schdadtteil kriegt (ä) Budget.
Doch jetz´ kummt des, was misch droa schdeert:
Dabbisch, wirklisch heechschder Grad,
was ma aus´ em HaFa heert,
eem Ausschuss im Gemeinderat:
Es gäb oageblisch nur een Kreis,
der weeß, was im Ort vor sisch geht:
d´ Bezirksbeirat, un uuhne Scheiß:
die Stadtteilv´rein sei´n obsolet.
Denk weider in dem Narrativ`:
„ein Geklüngel, nicht modern;
will nicht sagen, fast naiv,
dem Sachverstand doch ziemlich fern.“
Bei denne kummt ganz deitlisch raus,
vor allem uff der linke Seit´:
babbelt dumm, hockt nur im Haus,
lebt eh in der Vergangeheit!
Isch nemm eisch gern mol mit ä Zeit,
dann däädet´er beschdimmt ball raffe,
doch vorsischt, dieser Weg isch weit,
was mir im Johr so alles schaffe!
Bevor ma des vielleischt vergesse:
Fangt am beschde jetz´ mit oo,
un bleibt heit Oabend nach dem Presse-
Foto mol noch länger doo.
Awwer Leit´s, es isch wie immer,
die´s betrifft, sin gar net hier;
verbleiwe weider uuhne Schimmer,
entscheide in der alt Manier.
Liebe Wählerinne, Wähler,
guckt aa manschmol uff d´ Präsenz!
Uffs Parteibuch isch en Fehler,
am liebschde gar uff Kompetenz!

Wuuhiieh mit de Kinner?

Es dutt ma wirklisch zimmlisch weh,
bin doch mit dem Verei´ verbunne!
Ma muss sisch awwer ei´gesteh`:
Die Käärsch isch derzeit zimmlisch hunne.
Kann dem Trend, der abwärts leeft,
faschd nix meh´ entgegesetze!
So manscher scheinbar dauerschläft,
die Lethargie dutt misch entsetze!
Isch moan domit beschdimmt net die,
die hier vor Ort ihr Beschdes gewwe,
Äldeschde, Gemeindeteam,
sin net die Leit, die Schuld droa hewwe!
Bei beide sin´s die Gremie driwwer
Es gibt nur noch „Strukturprozesse“.
Schiebt Gelder riwwer un dann niwwer,
un dobei werd´ so viel vergesse!
Es konnt domols vor gut drei Johr,
net schnell genug mi´m Auszug gehe,
bis heit do kann ma, stellt eisch vor:
net irgendoanen Fortschritt sehe.
S´Gemeidezentrum vegetiert
seit viele Johre vor sisch hie!
Wenn ma die Heimat mol verliert,
verliert ma aa die Empathie.
Der Kinnergarde, klar, musst raus,
in Rohrbach hamma jo genug!
Zahlt Miete un hätt´ newedroo ä Haus!
Betriebswirtschaftlich net grad klug.
Apropos Rohrbach-Kinnergärde:
(St.) Theresia hot genauso dicht.
Isch will die Gründe net bewerde,
(doch) jetz´ sin Stadt un Käärsch verpflischt`!
In Rohrbach Oscht een Kinnergarde,
schlimm – doch kam´s net iwwer Nacht!
Wie lang wollt´er jetz noch warde?
bis er was dogeje macht!?
Es geht um Kinner, dutt´s bedenge!
Net nur drum: isch´s aa rentabel?
Misst des Thema ganz hoch hänge,
derzeit isch´s indiskutabel!
Der Käärsch, nadierlisch alle Konfessione,
wünsch isch aus vollem Herz´ heraus:
Än anner Fokus un Visione,
dann sieht´s vielleicht ball besser aus!

„Ihr seid enttarnt!“

SIe schdischt nadiierlisch glei ins Aag:
die iwwerbordende Präsenz!
Selten war die Resonanz so stark,
der Heidelberger Prominenz!
Mir wisse all, woran des liegt,
die Wohrheit lässt eisch eh kee Ruh;
die Tarnung isch eisch net geglickt.
jetzt gebt´s halt endlisch e´mol zu!
Was? Hab isch grad „Wahl“ vernumme?
Des isch b´schdimmt doch net der Grund,
dass sou viel Schdars nach Rohrbach kumme;
Gut: isch geb eisch d´Wohrheit kund:
Versetzt eisch mol in derren Lage!
Wie traurisch muss denn des wohl sei?
Däät ihr net allesamt verzage?
Isch glaab mir misse gnäädisch sei.
Sie kumme her vun ganz weit fort:
Un lebde doch am liebschde hier!
Odder sinn vum Nochbarort,
mit Rohrbach direkt vor der Diier!
Des isch jo fascht wie Tantalus,
beschdrooft uff ewisch, iwwers Maß,
er Dorscht un Hunger leide muss,
trotz Frischd un Wasser vor der Nas`.
Isch heer uff, sunnscht muss i heile!
Okay, isch geb´ eisch´s Ehrewort:
Ihr därfft so lang´er wollt verweile,
an unserem wunderscheene Ort!
…Okay, es isch aa ball die Wahl,
un die isch sogar zimmlisch wischdisch!
Fiir die Schdadt un iwwerregional,
doch wer vun eisch is denn der Rischdisch?
Die Froog isch gar net leischd zu kläre,
bei innsg´sammt 6 Bewerber*inne,
ihr werd´ eisch grad vielleischt beschwere,
des Gendern werr´ i nochher bringe!
Zunächschd die Wahl des Birjermeeschders:
Wie schunn g´sagt: ä engi Kischt.
Heechschdwahrscheinlisch – nee, isch wees, dass
es wohl erscht die Schdischwahl rischt.
Bis dohiie habt´er Zeit zu zeige:
eiern Plan, eier Vision;
därfft jetzat gar nix meh vergeige,
sunnschd isch des die Endstation!
Seid authentisch, klug un offe,
schdark un b´scheide parallel.
Un kabiert, isch kann´s nur hoffe:
Heidelberg hot viele Klientel!
Zuletschd en gut gemeinder Rat:
Dutt uns bitte vuu verschone!
Penlisch bis zum heechschde Grat:
diese Ummeldeaktione!
Isch sag jetz net, wer´s vun eisch war,
des wisst´ er selbschd am allerbeschde.
Isch weeß jo net - Isch´s eisch net klar,
was ihr domit fiir Zeische setzde?!
„Die Kinner mit gut 18 Johr,
die hier in Heidelberg schdudiere,
wähle misch“, so kummt ma´s vor,
„un isch muss gar net dabattiere…“
„Inhalt´ sin jo net so wischdisch,
die wähle misch jo sowieso!
Hauptsach die Pardei isch rischdisch,
die junge Leit, die ticke so…“
Sie kenne awwer, so sieht´s aus,
den Wuuhnort net alloi ummelde,
lockt` se all mit Freibier aus em Haus,
weil sunschd jo wischt´sche Schdimme fehlde.
Schdeckt doch diese Energie,
in Argumente un in Tade,
dann dutt ´er eisch so schnell nimmie,
dem eig´ne Oaseh´n selwer schade!
…Wenn oaner im November dann,
in Amt un Würde sisch befindet:
Macht klar, un zwar vum Oafang an,
was ihr fiir Rohrbach, eiern Lieblingsort, empfindet!
Als Gegeleischdung gem´ma eisch
ganz viel vun unser´m Mitgefühl!
Un wenn´s eisch dann dahoam mol reischt,
vielleicht sogar aa mol Asyl!

Beischbiel nemme!!

Kinners, war des ä Turnier -
vun allem, un fiier jeden was dabei!
Leideschaft in d´ heckschd` Manier.
Ja - so schee kann Fußball sei!
Die Fraue wusste zu begeischdern,
Taktik, Technik, Emotion!
Faschd alle Gegner konnt ma meischdern!
Fiir´d Männerfußball ä Lektion!
Keen Dünkel un kee Schdararällüre
Kee Rumgeheule un keen Streit!
Sie wollde nur die Kickschuh schnüre,
mit Charme un viel Bescheideheit!
Dazu im Fußball-Mudderland,
die Stimmung: eefach nur genial.
Die Sunn hot uns uffs Härrn gebrannt;
nur oans hot g´fehlt: der grouß Pokal!
Ganz annerschd werd des bei de Männer!
Jeder isch der grouße Schdar,
im Land „der tolle Fußballkenner“
der Traditionshochburg: Katar!
Kinners, was isch des fiir´n Scheiß,
do kann der Sport jo nur verliere!
Im Summer? Geht net - isch zu heiß!
Solle´t Leit beim Public Viewing friere…
Trotz Dezember kann ma dort
net ohne Klimaoalag spiele!
„Klimaschutz“- ä fremdes Wort,
muss d´ Stadie ständisch nunnerkiihle!
Wer braucht beim Gucke Bier und Wei?
Heißer Tee dutt´s aa zur Not.
Tja- ma misst halt Promi sei!
Denn sunnschd herrscht Alkoholverbot!
Doch die mit Abschdand schlimmschde Sauerei:
Menscherecht` mit Fiiß gedrede!
Dazu die ständisch Litternei:
Mir werre dem entgegetrede!
Bis heit isch widder nix bassiert!
Beim Stadie-Bau: hunnerde vun Dode!
Hätt es die FIFA interessiert -
hätt ma´s Turnier doch dort verbode!
Isch hab misch immer do druff g`freit!
WM- des Highlight vun vier Johr.
Desmol kummt ma´s, liewe Leit,
in Summe eefach ganz falsch vor!
Eem Land hot des scheins aa net g´schmeckt.
Hab´s jetzat erscht realisiert!
Respekt Italie, escht Respekt!
Mit Absischt net qualifiziert!
Die FIFA werd´s wohl erscht kabiere,
beziehungsweis` werd´s dann erscht jucke:
wenn mir die Spiele boykottiere,
un sie den Scheiß allooi oagucke!
Wenn eisch des schlecht` Gewisse plagt,
un diese Farce genauso steert;
Ihr find´ misch uff em Weihnachtsmarkt –
so wie sisch´s fiir Dezember g´heert!

Uffwache!

Noch 16 Johr war´s sunneklar:
Alles muss viel besser werre!
Wer Führung b´schdellt, der kriegt se aa.
Ma könnt laut lache – nee! eher plärre!
Es sin nadierlisch schwere Zeide,
die Krise kumme Schlag uff Schlag!
Isch dunn eisch wirklisch net beneide;
doch s´isch mein Job, dass isch was sag:
De Oafang der illustre Rund -
bekanntlisch schdinkt der Fisch vum Kopp,
isch der Regierungschef vum Bund.
Es dutt ma Leid: bis jetz´ en Flopp!
CumEx, Warburg, Wirecard
Wo soll ma dobei nur beginne?
Isch faang mol oa… ach Mensch, wie schad:
kann misch uff oamol net entsinne!
Im Amt, un des isch viele klar,
weil Griie un schwarz die Falsche wählde!
Nooch eem Johr werd´s jetz offenbar,
dass eefach d´ Konkurrende fehlde.
Kee Führung und keen roder Fade,
kee Leideschaft un kee Vision.
Folgt Merkel uff´em Abblock- Pfade,
un manschmol oaner Illusion.
Des G´setz zur Impfplischd wurd zum Hohn,
ä Farce- die Lieferung vun Waffe!
Kee Middel gege d´ Inflation,
die Scher´ werd auseinannerklaffe!
Kann griie und gelb net moderiere,
steht g´fiiehlt andauernd zwische d´ Stiiehl
Isch hoff´, mir misse net ball friere,
weil´d Ambel sisch net oanisch werre will.
Atomkraft: bleed, doch fiir ä Zeit,
vielleischt ä bissel Linderung!
Abbas, als Gascht, geht viel zu weit!
un Scholz sagt nix- des kenn´ ma schunn!
Wie gesagt: er isch jo net allee,
es gibt noch anner` Spezialischde!
Doch die Erkenntnis dutt schunn weh:
Wer vunn denne soll´s en rischde??
Lauterbach mit großer Gosch!
Seitdem im Amt, net viel gerisse!
Die Oafangs- Sympathie erlosch,
bei viele Leit´ hot er´s verschisse.
Lindner wie gewohnt aalglatt,
kassiert hier ei, dutt´s dort verschenge:
Umverdeilung, Tankrabatt,
anstatt die Schdeiern mol zu senge!
Die Eelkonzern dutt´s tierisch frei´n;
erhöhe d´Preise wie se wolle!
Ma frägt sisch: wie kann des nur sein?
Der Schdaad guckt zu; s´gibt kee Kontrolle!
Robert Habeck stets bemiieht,
vun viele Leit` zum Kanzler auserkore.
Jeder weeß, was ball geschieht:
die Gasumlag´ fliegt um die Ohre!
Des End, un Leit`– geht´s noch bekloppter?
fliegt irgendwuu mim Sohn, ganz schick,
weit fort im grouß` Regierungshelikopter.
War schee uuhne disch, warum kam´schen zurick?
Sie isch fiir misch der beschd Beleg:
Ressorts vergewwe nur noch G´schleschder,
ob Oschd, ob Weschd: der falsche Weg!
Noch Leischdung wär´ doch viel gereschder!
Ihr seid am Oafang, dehalb: los!
Isch hoff`, ihr habt viel mehr noch druff.
Sunscht geht´s leider ball in´d Hos`!
Dutt uns de G´falle: wacht endlisch uff!

Wehe, wehe, wenn isch uff des Ende sehe!

Diese G´schicht` isch een Erfolg.
Wunderbar, wie sie gedieh!
Errungeschaft- (faschd) vum ganze Volk:
Die geglückt´ Demokratie!
Der Begriff heeßt, klär´ma´s erschd,
der Reschdsstaat dutt de Rahme iwwerwache!
Ansunschde, dass die Mehrheit herrscht,
un net, es jedem rescht zu mache!
Freie Meinung, freie Presse,
Pluralismus un des Rescht!
Do droa werd so viel gemesse,
do droa glaawe mir ganz feschd!
Es blieb so, weil mir all` stramm,
uns gege Extremischde wehrte;
ob links, ob reschds- mir hielde z´amm`!
verteidischd´ lange diese Werde!
Isch sag jetz net, s´isch nimmi so!
Meinungsdiktatur- än Quark!
Hab viel mehr Reschd` als annerschdwo.
Werd net verhaft´, wenn isch was sag!
Doch ma schbürt in denne Dage,
irgendwas isch annerschd worre!
Mansche wolle nimmi sage,
was se denke, ganz verworre!
Ä Minderheit, oft laut un radikal,
denkt, nur sie hätt´ die Erkenntnis.
Mäsch net mit, bisch asozial,
un bringsch d´ G´schellschaft in Bedrängnis.
Un hosch´e Mol was Falsches g´sagt,
entschuldigsch´disch un siesch´s aa ein,
hott´s Tribunal bereits getagt:
„schuldig! Un dazu ä Schwein!“
Weeß net, wer misch mehr uffregt:
diese Leit, die´s propagiere,
odder die, die unentwegt,
ihren Arsch in´d Hos verliere.
Dort, wuu Rassismus wirklisch existiert,
wuu Mensche anner` unnerdricke,
do gibt´s kee Froog, s´werd reagiert,
doovu därff´ ma nie abricke!
Doch s´nimmt wiklisch iwwerhand!
Jedes Kinnerlied isch ä Problem,
Verkleidunge „kulturelle Aneignung“ genannt,
gilt´s aa, wenn Tourischt` in Tracht uff d´Wiesen geh´n!?
Ravensburger, ARD:
schad, dass ihr den Weg beschreidet,
uff Druck vun oaner Handvoll am PC,
eisch fiir d´ falsche Weg entscheidet!
Des Gendern isch ä ähnlisch G´schicht`.
Die, die´s wolle, solle´s mache!
Falsch isch, wenn ma d´Leit verpflischd;
häufisch nämlisch schun Tatsache!
Zu kläre wär noch: Genderschdern,
Doppelpunkt un Unnerschdrich?
Die Froog soll´t ma wohl noch klärn,
bevor ma vun „verbindlisch“ schpricht!
Komisch, sunscht bei alle Froog,
werd´ uff d´Wisseschaft geheert.
Beim Gendern isch´s wohl net en vogue,
was Sprachforscher un Duden schdeert!
Ins´gsamt wär´s ä heeres Ziel,
wenn ma z´amm Lösung`entfaldet;
denn es fehlt ball nimmi viel,
dass sisch d` G´sellschaft rischdisch schbaldet.
Viel muss ma jo eh net ändern,
seht er: isch hab dem entschproche,
in der Redd, uuhne zu gendern,
jeden vun eisch gleisch oag´schproche!

Borschtpokal

Es isch so weit: isch wer´verkinde,
hott` widder mol die Qual der Wahl.
In Rohrbach könntschd ganz viele finde,
Träger fiir de Borschtpokal!
Der Bernd hot ihn in`s Lewe g`rufe
fir Leit, wo`s alle wisse solle,
die immer ä Mords-Pensum abrufe
un net nur schwätze, sondern schaffe wolle!
In dem Johr kriegt en ä Person,
die oft im Hinnergrund agiert.
Er macht un dutt un will keen Lohn,
obwohl bei vielem engagiert!
Es gibt keen bess´re Sammler vun de Schbende,
fünf Schdund Grille fällt net schwer!
Geht hiie un bleibt gar bis zum Ende,
bei de Sitzung` fiir Verkehr.
Genau die braucht ma, solsche Leit!
Wie schunn g´sagt: oft ganz weit vorn!
Ich iwwereisch mit großer Freid`: den Pokal unser´m Kai Horn!

 

Konstantin Waldherr überreicht den Borschpokal an Kai Horn

Epilog

Es gäb` noch souviel zu verzähle,
doch alles hot emol e End.
Jetzat wolle mer d´ Gorjel eele,
weil´s jedem schunn im Hals drin brennt.
Auf ihr Leit, des werd der Hit:
mir gehe z´samme vor zur Hall.
Des Portemonnaie nemmt´er schee mit,
sunscht werd doch eier Geld net all!
Mir losse´s mol so rischdisch krache!
Drei Daag lang sin ma jetzat froh.
Ihr braucht eisch mol kee Sorje mache,
die sin am Muundag aa noch do!
Un kummt´er dann e´mol net weider,
wenn´er noch der Wohrheit forscht:
verzweifelt net! Kummt, des isch g´scheider!
zu mir, zu eierm Kerweborscht!

Bonus

(Demonstration im Rohrbacher Feld im April 2021)
Des Feld g´hert uns, die Finger weg!!
Die erschde zwee Mol in zivil,
hab isch hier aa brav demonstriert;
drei Hiobsbotschaft` sin zu viel!
Es isch so weit: der Borscht is echauffiert!
Als Kerweborscht in Korzarbeit
hab isch gedenkt: „schaff´sch wennigschdens heit“!
Un kannsch disch jetzat dorum kimmern,
un an´s Verspresche vun Zwee19 all erinnern!!
Denn domols haww´i d´ Stadt gewarnt,
vor d´ Birjermeeschder net gekuscht,
de Rexit deitlisch oagemahnt!
wenn d´Stadt alsball so weiderpfuscht!
Wahrlisch hot´s net lang gebraucht,
naja, isch hab aa mit gereschent,
bis d´ Stadt mol widder Bockmischt baut,
die Zeit isch reif: s´werd abgereschent!

Refrain:
Baut´s woannerschd, is ma worscht!
In Rohrbach hot´s fir eisch keen Zweck!!
Entschlosse sagt da Kerweborscht:
Des Feld g´hert uns, die Finger weg!
Denn was geplant isch, kann´s net sei:
Ä Kadaschdroph, ä Riese- Sauerei!!
Drei Schandfleck´ wolle se errischde,
un domit unser Feld vernischde!
Schun klar: uff eier Kapp do geh´n nur zwee:
Abstelloalag un Gewerbegebiet.
Die Pipeline will die Terranets BW,
s´macht awwer aa keen Unnerschied!!...
Ihr habt uns net mol vorgewarnt,
und kennt den Plan seit eenem Johr!!
euer Vorgehe als „kriddisch konstruktive Begleidung“ getarnt!
mir kummt´s wie - Opportunismus vor!!
Rohrbach sagt jetz g´schlosse: „Nää“!!
nooch hunnert Johr als Melkkuh fir die Stadt!
Macht doch eiern Scheiß allää!!
Die „reische Braut“ hot´s jetzat satt!
Ihr habt uns domols viel versproche,
verschwiege, dass mir uns fascht halbiere!!
habt oftmols euer Wort gebroche!!
Mir werre nu´ keen Zendimeder mehr verliere!!

Refrain:
Baut´s woannerschd, is ma worscht!
In Rohrbach hot´s fir eisch keen Zweck!!
Entschlosse sagt da Kerweborscht:
Des Feld g´hert uns, die Finger weg!
Mir werre in Verhandlung` trede,
mi`m Berg ä neii Ära präge!
Un kindische - ohn´ viel Gerede,
die Eigemeindungs-Schand-Veträge!!
Mi´m Boxberg un mi´m Emmertsgrund,
die jo vun Rohrbach mit abstamme!
Do gewwe ma gemeinsam kund:
was z´amme g´heert, wächst widder zamme!
in U´abhängischkeit vereine,
gemeinsam feiern, Gott wär des schääi!!
die Sunn däät hell, ja strahlend scheine!
unser´n Independance Day!
Ä Zukunft, die ma wirklisch g´fällt:
ä groußi Kreisstadt, vun eisch frei!
Un ball heeßt´s uff der ganze Welt:
Heidelberg?? Des muss do newer Rohrbach sei! …
Es isch die allerletschde Warnung!
Hab´s grad e´mol vorweggenumme,
was bei uns länger isch in Planung.
Macht weider so  - un ´s werd so kumme!...

Refrain:
Baut´s woannerschd, is ma worscht!
In Rohrbach hot´s fir eisch keen Zweck!!
Entschlosse sagt ganz Rohrbach jetz:
Des Feld g´hert uns, die Finger weg!